मुंबई: दिसायला अगदी मेथी सारखी असणारी घोळची भाजी. घोळ या भाजीला मोठी घोळ, भुईगोळी, कुरफा अशी स्थानिक नावे मिळालेली आहे. मराठवाडा व विदर्भ या ठिकाणी घोळच्या दुस-या प्रजातीचे उत्पन्न होते. या भाजीमुळे शरीरातील उष्णता कमी होते. घोळीच्या भाजीत अनेक पोषक घटक, जीवनसत्त्वे (vitamins), खनिजे व फायबर्स अधिक प्रमाणात मिळतात. या भाजीत कोलेस्ट्रॉल व कॅलरीज अत्यंत कमी प्रमाणात असतात. घोळीच्या पानांमध्ये ओमेगा ३ फॅटी अॅसिड भरपूर प्रमाणात आढळते व हृदयविकारापासून दूर ठेवण्यासाठी मदत होते. या भाजीचा उपयोग कसा होतो हे पाहूया.

हे देखील पहा-

⦁ घोळ व लहान घोळ मूळव्याधीवर गुणकारी असून ते उत्तम औषध आहे.

⦁ या भाजीमुळे अल्सर होत नाही ही भाजी थंड असते.

⦁ घोळभाजीत कॅल्शियम, फॉस्फरस, मॅग्नेशियम, सोडियमसारखी खनिजे आढळतात.

⦁ यात अ जीवनसत्त्व असते. या भाजीच्या सेवनाने शरीरातील वाढलेला कफ व पित्तदोष कमी होतो तसेच आतड्यांची हालचाल वाढून पोट साफ होते.

⦁ उन्हाळ्यात हातापायांची, डोळ्यांची होणारी जळजळ या भाजीने कमी होते.

⦁ या भाजीत तांब्याचे व लोहाचे प्रमाण अधिक असल्यामुळे रक्त वाढण्यास मदत होते.

⦁ या भाजीचे आहारात सेवन केल्यास वजन कमी होण्यास मदत होते.

⦁ या भाजीचे अतिप्रमाणात सेवन केल्यास मुतखडा होण्याची शक्यता असते.

अशी बनवा घोळीची भाजी

साहित्य : २ मोठे कांदे, १ टोमॅटो, आलं-लसूण पेस्ट, अर्धा कप बेसन, चवीपुरता चिंचेचा कोळ, आवश्यकतेनुसार तेल, मोहरी, तिखट, मीठ, हळद व कोथिंबीर .

कृती : सर्वप्रथम प्रत्येकी वेगवेगळे घोळीची पाने, कांदा (onion) व टोमॅटो बारीक चिरून घ्या. कढईत तेल गरम करून त्यात मोहरी चिरलेला कांदा व टोमॅटो घालून लालसर होऊ द्या. त्यानंतर त्यात आलं-लसूण पेस्ट, तिखट, मीठ, हळद (turmeric) व घोळीची पाने चांगले परतून घ्या. घोळीची पाने शिजल्यानंतर २ चमचे बेसन घाला. काही वेळा नंतर वरून चिंचेचा कोळ व कोथिंबीर घाला.

डिस्क्लेमर: या भाजीचा आहारात समावेश करताना कृपया त्याची योग्य ती खात्री करावी.

Edited By - Komal Damudre