डायबिटीजच्या रुग्णांनी गोड पदार्थ खाणे अत्यंत चुकीचे मानले जाते. कारण डायबिटीजचे मुळ कारण म्हणजे गोड पदार्थांचे जास्त प्रमाणात सेवन करणे असे आहे. त्यामुळे गोड पदार्थांपासून कायमचे अंतर ठेवावे लागते. अशी समजूत अनेकांच्या मनात आहे. मात्र आहारतज्ज्ञांच्या मते, योग्य पद्धतीने आणि संतुलित प्रमाणात बनवलेले गोड पदार्थ मधुमेही रुग्णही खाऊ शकतात.

तज्ज्ञ सांगतात की, साखरेऐवजी नैसर्गिक पद्धतीने गोड असलेले पदार्थ मेधुमेही सेवन करु शकतात. खजूर, अंजीर, मध, स्टीव्हिया यांसारख्या नैसर्गिक पर्यायांचा गोड पदार्थ बनवताना वापर केला, तर रक्तातील साखरेवर फारसा वाईट परिणाम होत नाही. याशिवाय हे पदार्थ शरीराला फायबर, खनिजे व जीवनसत्त्वेही देतात.

उदाहरणार्थ, जर साखर वापरून लाडू करण्याऐवजी खजूर-ड्रायफ्रूटचा वापर करुन लाडू बनवत असाल. तर त्यासाठी खजूराचे तुकडे करून ते थोडेसे तुपात परतवावे. त्यात बदाम, काजू, अक्रोड यांसारखे सुकेमेवे टाकून मिश्रण घट्ट करावे. नंतर छोटे लाडू वळले की स्वादिष्ट आणि पौष्टिक खजूर-ड्रायफ्रूट लाडू तयार होतात. यामध्ये साखरेचा वापर अजिबात नसल्याने हे लाडू मधुमेही रुग्ण निश्चितपणे खाऊ शकतात.

तसेच गाजर हलवा किंवा शेवया खीर यांसारख्या पदार्थात थोडे दूध, साखरेऐवजी स्टीव्हिया किंवा मधाचा वापर करून गोडवा आणता येतो. आहारतज्ज्ञांच्या मते, प्रमाण महत्त्वाचे आहे. गोड पदार्थ जरी नैसर्गिक पर्यायाने बनवले तरी त्याचा अतिरेक टाळावा. मधुमेही रुग्णांनी डॉक्टर किंवा आहारतज्ज्ञांच्या सल्ल्यानुसार गोड पदार्थांचा समावेश आहारात केला, तर ते योग्य आणि आरोग्यदायी ठरू शकते. त्यामुळे मधुमेहात गोड खाणे अशक्य नाही, तर योग्य पद्धत आणि योग्य प्रमाण हेच त्याचे रहस्य आहे.