झोप तुमच्या कामावर, वय आणि तुमच्या जीवनशैलीवर अवलंबून असते. पण निरोगी राहण्यासाठी प्रत्येक व्यक्तीने कमीत कमी ७-८ तास झोप घेणे आवश्यक आहे. यापेक्षा कमी झोप घेतल्याने शरीरावर वाईट परिणाम होतो. पण तुम्हाला माहिती आहे का, महिलांनी पुरूषांपेक्षा जास्त वेळ झोप घेणं आवश्यक आहे? महिलांमध्ये होणाऱ्या हार्मोनल बदलांमुळे त्या जास्त झोपतात. त्यामुळे जाणून घेऊ महिलांनी किती वेळ झोप घेतली पाहिजे?

डॉक्टरांच्या मते महिलांच्या आयुष्यात होणाऱ्या हार्मोनल बदलांमुळे त्यांना जास्त झोपेची आवश्यकता असते. मासिक पाळी, गर्भधारणा आणि (मेनोपॉज)रजोनिवृत्तीमुळे महिलांची झोप बिघडते. या स्थितीत महिलांची झोप अनेक वेळा खंडित होते आणि ८ तास झोपल्यानंतरही शरीराला पुरेशी विश्रांती मिळत नाही. महिलांच्या आरोग्याबाबत डॉ. मनन व्होरा यांनी इंस्टाग्रामवर एक व्हिडिओ शेअर केलाय.

महिलांनी किती वेळ झोप घ्यावी?

महिलांना दररोज पुरूषांपेक्षा २० मिनिटे जास्त झोप घ्यावी. परंतु अनेकदा असे दिसून येते की, महिला पुरूषांपेक्षा कमी झोपतात. भारतात महिला सकाळी लवकर उठतात. घरातील कामे लवकर करण्याच्या नादात रात्री उशिरा झोपतात. त्याचा परिणाम त्यांच्या संपूर्ण दिवसावर पडत असतो. कामाच्या ठिकाणी महिलांना आळस आणि निरुत्साही वाटतं असतं. त्याचा परिणाम त्यांच्या आरोग्यावर होत असतो.

महिलांनी दिवसातून कमीत कमी ८ तास झोप घेतली पाहिजे. जर तुम्हाला मासिक पाळी किंवा गरोदरपणात जास्त झोप येत नसेल, तर तुम्ही दिवसा झोप घ्यावी. कमीत कमी ८ तासांची गाढ झोप शरीराची दुरुस्ती करते. हार्मोन्स संतुलित करते. जर रजोनिवृत्ती दरम्यान निद्रानाशाची समस्या वाढली तर जेव्हा तुम्हाला झोप येईल, तेव्हा तुम्ही तुमची झोप घ्यावी.