मराठा आंदोलक मनोज जरांगे पाटील यांनी आपला मोर्चा मुंबईकडे वळवला आहे. अंतरवाली सराटीतील आपले उपोषण सुरुच ठेऊन ते रुग्णवाहिका आणि दोन गाड्यांसह मुंबईकडे निघालेत. त्यांच्या सोबतीला मोठ्या संख्येने मराठा बांधव सहभागी होत आहेत. दरम्यान मुंबई पोलिसांनी जरांगे पाटलांना मुंबईत आंदोलनाची परवानगी नाकारलीय. तरीही ते आपल्या आंदोलनावर ठाम आहेत. त्यामुळेच ते मुंबईकडे रवाना झालेत.

जरांगे पाटलांचा पहिला मुक्काम बीड जिल्ह्यातील पाटोद्यात होणार आहे. मनोज जरांगे पाटील यांच्या स्वागताची जय्यत तयारी पाटोद्यात करण्यात आलीय.

पाटोदा नगरीमध्ये सामाजिक जातीय सलोख्याचे दर्शन पाहायला मिळाले आहे वंजारी समाजाचे नेते विजयसिंह उर्फ बाळा बांगर यांच्याकडून मनोज जरांगे पाटील यांच्या उपोषण आणि आंदोलनाला वंजारी समाजाचा पाठिंबा दिलाय.

मांजरसुंबा ते पाटोदा दरम्यान 14 तर पाटोदा शहरात 11 मोठे अन्नछत्र उभारण्यात आले आहे. 25 ठिकाणी पार्किंगची व्यवस्था झाली आहे.

मनोज जरांगे पाटील यांचा ताफा मुंबईकडे मार्गस्थ झालाय. बीड जिल्ह्यात ठिकठिकाणी त्यांचं जल्लोषात स्वागत होत आहे. याच ताफ्यात मोठ्या संख्येने मनोज जरांगे समर्थक सहभागी झाले आहेत.

बीड जिल्ह्यातील गेवराई येथे हाच ताफा दाखल झाला असताना ताफ्याची ड्रोन दृश्य व्हायरल झाली आहेत. येथे मोठ्या संख्येने मराठा बांधव दिसून येत आहेत.

आता, रात्रीची काही दृश्ये समोर आली असून गेवराई जवळील पाडळसिंगी टोल नाक्यावर मोठ्या संख्येने मराठा बांधव दिसत आहेत.