करंगसेम (बाली) - इंडोनेशियातील बाली येथे माउंट अगुंग या ज्वालामुखीचा उद्रेक झाल्याने वातावरणात प्रचंड धूर आणि राखेचे ढग पसरले आहेत. बाली बेटावर सरकारने अतिदक्षतेचा इशारा दिला आला आहे. ज्वालामुखीतून निघालेल्या राखेमुळे विमान वाहतुकीला 'रेड वॉर्निंग' देण्यात आली आहे. या ज्वालामुखीचा आठवड्यातला हा दुसरा उद्रेक असून, माउंट अगुंगमधून निघालेल्या राखमिश्रित धुराचे ढग 4000 मीटर (13,100 फूट) उंचीवर गेले आहेत. बाली बेट हे जगातील लोकप्रिय पर्यटनस्थळ आहे. बालीमधील सेमिन्याक आणि कुटा ही मुख्य पर्यटनस्थळे आहेत. ही पर्यटन स्थळे ज्वालामुखीपासून 70 किलोमीटर अंतरावर आहेत. राखेचे ढग सध्या बाली बेटाच्या पूर्वेकडील लोम्बोक बेटाकडे सरकत आहेत. त्यामुळे येथील मुख्य विमानतळ पूर्णतः बंद करण्यात आले आहे. या ज्वालामुखीच्या तोंडाजवळ आता मॅग्मा म्हणजे वितळलेले खडक दिसू लागल्याचे भूगर्भतज्ज्ञांनी सांगितले आहे.