बॉलिवूड अभिनेता वरुण धवन बाप झाल्याची वृत्त समोर आले आहे. वरुणची पत्नी नताशा दलालने 3 जून 2024 रोजी एका मुलीला जन्म दिला. मुलाच्या आगमनाने धवन आणि दलाल कुटुंब खूप आनंदी आहे. मुलाच्या स्वागताची तयारी करत आहेत. दरम्यान ही आनंदाची बातमी समजताच वरुण आणि नताशाच्या नातेवाईकांनी रुग्णालयाबाहेर आणि आत गर्दी केली. त्यांचे मित्र आणि चाहते वरुण आणि नताशाला अभिनंदन करत आहेत.

३ जून रोजी सकाळी नताशा दलालला प्रसूती वेदना सुरू झाल्या, त्यानंतर तिला रुग्णालयात दाखल करण्यात आले. त्यानंतर आनंदाची बातमी आली. वरुण धवन आणि त्याची पत्नी नताशा दलाल यांच्या चाहत्यांकडून आणि मित्रांकडून अभिनंदनाचा वर्षाव होत आहे. साधरण चार महिन्यांपूर्वी वरुणने सोशल मीडियावर स्वतःचा आणि नताशाचा फोटो पोस्ट केला होता. या फोटोतून त्याने आम्ही आई-वडील होणार असल्याची बातमी दिली होती. त्या फोटोमध्ये नताशाचा बेबी बंप दिसत होता आणि वरुण बेबी बंपला किस करताना दिसत होता.

वरुणने 24 जानेवारी 2021 रोजी नताशासोबत अलिबागमध्ये लग्न केले होते. वरुण आणि नताशा शालेय जीवनापासून एकत्र आहेत. आधी दोघांची मैत्री झाली आणि नंतर वरुणने तिला इम्प्रेस करून आपली मैत्रीण बनवले. नताशाने वरुणला चार वेळा प्रेमाचा नकार दिला होता. मात्र ती हो म्हणेपर्यंत वरुणने हार मानली नव्हती.

दरम्यान वरुण सध्या राज आणि डीकेचा चित्रपट 'सिटाडेल: हनी बनी' आणि ॲटलीच्या 'बेबी जॉन'साठी शूटिंग करत आहे. 'सिटाडेल: हनी बनी' मध्ये वरुण सामंथासोबत दिसणार आहे. तर 'बेबी जॉन'मध्ये कीर्ती सुरेश आणि वामिका गब्बी अभिनेत्री असून त्यांची महत्त्वाची भूमिका आहे.