Summary -

• टीव्ही अभिनेत्याच्या कारला मुंबईत अपघात

• झीशान खानच्या कारचा वर्सोवाजवळ भीषण अपघात

• एअरबॅग्स उघडल्यामुळे अभिनेता थोडक्यात बचावला

• दोन्ही कारचे मोठे नुकसान झाले

टीव्ही अभिनेता झीशान खानच्या कारला मुंबईत भीषण अपघात झाला. ८ डिसेंबरला रात्री उशिरा ही घटना घडली. अभिनेत्याच्या कारने समोरून येणाऱ्या दुसऱ्या कारला जोरदार धडक दिली. या अपघातामध्ये दोन्ही कारचे मोठे नुकसान झाले. सुदैवाने या अपघातामध्ये अभिनेता सुखरूप बचावला. पण या अपघातामुळे अभिनेत्याला मोठा धक्का बसला.

मिळालेल्या माहितीनुसार, प्रसिद्ध टीव्ही मालिका 'कुमकुम भाग्य' फेम अभिनेता झीशान खान मोठ्या अपघातातून थोडक्यात बचावला. पण अपघातामुळे त्याला मोठा धक्का बसला. ८ डिसेंबर रोजी रात्री ८.३० वाजताच्या सुमारास मुंबईच्या वर्सोवा परिसरात त्याची कार आणि दुसऱ्या कारची समोरासमोर धडक झाली. या अपघातामध्ये दोन्ही कारचे मोठे नुकसान झाले.

अपघातानंतर एअरबॅग्स तात्काळ उघडल्यामुळे अभिनेता झीशान खानचे प्राण वाचले. अपघातानंतर तो सुरक्षित आहे. मात्र धक्क्यात असून वैद्यकीय तपासणी सुरू असल्याची माहिती समोर आली आहे. या अपघातानंतर अभिनेता पोलिस ठाण्यात तक्रार दाखल करण्यासाठी गेला होता. अपघातानंतर घटनास्थळी मोठी गर्दी देखील झाली होती.

दरम्यान, झी टीव्हीवरील 'कुमकुम भाग्य' या मालिकेमध्ये झीशान खानने आर्यन खन्नाची भूमिका साकारली होती. ही भूमिका त्याने २०१९ ते २०२१ दरम्यान साकारली होती. या मालिकेच्या माध्यमातून तो घराघरात पोहचला. त्यानंतर तो एकता कपूरच्या ब्लॉकबस्टर शो 'नागिन ६' आणि 'लॉक अप'मध्ये दिसला. त्यानंतर तो 'बिग बॉस ओटीटी सीझन १' मध्येही दिसला होता. झीशान खान टीव्ही शोपासून दूर असून सध्या तो म्युझिक व्हिडिओंमध्ये काम करत आहे.