The Kapil Sharma Show First Promo | मुंबई : प्रसिद्ध कॉमेडियन कपिल शर्माचा(Kapil Sharma) लोकप्रिय कॉमेडी शो 'द कपिल शर्मा शो'(The Kapil Sharma Show) जोरदार कमबॅक करण्यासाठी सज्ज झाला आहे. नुकताच 'द कपिल शर्मा शो'चा प्रोमो रिलीज झाला आहे. ज्यामध्ये कॉमेडी किंग कपिल शर्मा त्याच्या शोच्या सर्व कलाकारांसोबत दमदार सुरुवात करताना दिसत आहे.

'द कपिल शर्मा शो'च्या या प्रोमो व्हिडीओसह, या शोच्या प्रीमियरची तारीखही समोर आली आहे. कपिल शर्मा त्याच्या संपूर्ण टीमसोबत १० सप्टेंबरपासून पुन्हा एकदा टीव्हीवर परतणार आहे.

जून महिन्यात मागचं पर्व संपल्यानंतर प्रेक्षक 'द कपिल शर्मा शो'च्या नव्या सीझनची आतुरतेने वाट पाहत होते. खरं तर कपिल शर्माचा हा शो वर्षानुवर्षे प्रेक्षकांचे मनोरंजन करत आहे. टीव्हीचा सर्वोत्कृष्ट कॉमेडी शो म्हणून पुन्हा एकदा कपिल शर्मा त्याच्या संपूर्ण टीमसोबत प्रेक्षकांना हसून हसून लोटपोट करण्यासाठी येत आहे. सोनी वाहिनीने आपल्या इन्स्टाग्राम हँडलवर कपिल शर्मा शोचा नवीन प्रोमो व्हिडीओ शेअर केला आहे.

या व्हिडीओमध्ये कपिल शर्मा जखमी अवस्थेत हॉस्पिटलमध्ये दाखल असल्याचे दिसत आहे. यासोबतच तो आपल्या शोमधील सर्व कलाकारांची ओळख करून देतोय. पण यादरम्यान कपिल शोमधील त्याची पत्नी म्हणजेच कलाकार सुमोना चक्रवर्तीला ओळख देण्यास नकार देतो. कपिल सुमोनाकडे बघतो आणि विचारतो, 'या ताई कोण आहेत?' यावर संपूर्ण टीम त्याला तुझी बायको असल्याचे सांगतात. ते नाकारून कपिल एका दुसऱ्या महिलेला आपली बायको समजून तिच्याकडे धावत जातो, तेव्हा शोची जज अर्चना पूरण सिंह रागात त्याला ओढताना दिसते.

'द कपिल शर्मा शो'चा हा लेटेस्ट प्रोमो व्हिडीओ चाहत्यांना खूप आवडला आहे. कपिल शर्माच्या या शोचा हा प्रोमो व्हिडीओ सोशल मीडियावर तुफान व्हायरल होत आहे. कपिल शर्मा हा कॉमेडी शो १० सप्टेंबरपासून सोनी टीव्हीवर रात्री ९.३० वाजता प्रसारित होईल.