Akshaya Naik New Theater

‘सुंदरा मनामध्ये भरली’फेम अक्षया नाईकने फार अल्पावधीतच टेलिव्हिजनससृष्टीत लोकप्रियता मिळवली आहे. त्या मालिकेच्या माध्यमातून तिने छोट्या पडद्यावर पदार्पण केले होते. छोट्या पडद्यावरुन अक्षया आता रंगभूमीवर पदार्पण करणार आहे, अर्थात नाटकसृष्टीत ती पदार्पण करणार आहे. भूमिका थिएटर्स आणि वाईड अँगल एन्टरटेन्मेंट यांनी एकत्रित नाटकाची निर्मित केली आहे. नुकताच सोशल मीडियावर अक्षया नाईकचा नाटकातील पहिला लूक समोर आला आहे.

अभिनेत्रीचा हा नवा लूक नुकताच शेअर करण्यात आला असून अल्पावधीतच तिच्या लूकची चर्चा होत आहे. अभिनेत्रीचा नाटकातील हा नवा लूक ‘राजश्री एंटरटेन्मेंट’च्या सोशल मीडिया पेजवर शेअर करण्यात आला आहे. अक्षयाचा या नाटकामध्ये एका वृद्ध महिलेचा लूक साकारला आहे, जी आपल्या पतीला मॉर्निंग वॉकला जायला उशीर होतोय, असं म्हणताना दिसते. ती पुढे म्हणते, “अहो किती उशीर?, नेहमी तुमच्याचमुळे उशीर होतो आपल्याला, आपल्याला वॉकला जायचंय, लग्नाला नाही. माझं झालाय आवरुन, चला लवकर.” असं वाक्य ती बोलताना दिसतेय.

ज्येष्ठ अभिनेते दिलीप प्रभावळकर यांनी लिहिलेलं नाटक काही वर्षांपूर्वी रंगभूमीवर आलं होतं. या नाटकाचं प्रेक्षकांकडून चांगल्या प्रमाणात कौतुकही झालं होतं. प्रभावळकर यांच्या दर्जेदार लेखणीतून साकारलेल्या या नाटकाला साधारणतः आता पंचवीस वर्षे होऊन गेली आहेत. मात्र हलकेफुलके असलेले हे नाटक आजही तितकेच ताजेतवाने आहे. नाटकाचे संगीतकार सुप्रसिद्ध ज्येष्ठ संगीतकार अशोक पत्की आहेत.

अक्षया नाईक "सुंदरा मनामध्ये भरली" या मालिकेतून घराघरात पोहोचली. पहिल्याच मालिकेत आव्हानात्मक भूमिका असल्याने अभिनेत्रीने आपला अभिनय क्षमता दाखवून दिली. त्यामुळे अक्षया सशक्त अभिनेत्री असल्याचं स्पष्ट झालं. या नाटकातील तिच्या भूमिकेबद्दल तिला विचारले असता तिने अजुन थोडी प्रतीक्षा करावी असे सांगितले. अक्षयाबरोबर नाटकात आणखी कोण कलाकार आहेत?, हे नाटक रंगभूमीवर कधी प्रेक्षकांच्या भेटीला येणार? याचे उत्तर अद्याप गुलदस्त्यात आहे.