Actress Surbhi Chandna:

२०२३ हे वर्ष बॉलिवूडसह टेलिव्हिजन इंडस्ट्रीतील अनेक कलाकारांसाठी खूपच खास ठरले. या वर्षात त्यांनी लग्न करत आयुष्याची सुरुवात केली. आता २०२४ या नव्या वर्षात देखील अनेक सेलिब्रिटी लग्न करण्याच्या तयारीमध्ये आहेत. बॉलिवूड अभिनेता आमिर खानची मुलगी आयरा खान आज विवाहबंधनात अडकणार आहे. त्याचसोबत अभिनेत्री रकुल प्रित सिंग पुढच्या महिन्यामध्ये लग्न करणार असल्याचे सांगितले जात आहे. अशातच टीव्ही अभिनेत्री सुरभी चंदनाच्या लग्नाच्या (Surbhi Chandna Wedding) बातम्याही समोर येत आहेत. ज्यासाठी तिचे चाहते खूप उत्सुक दिसत आहेत.

'तारक मेहता का उल्टा चष्मा' ( taarak mehta ka ulta chashma) फेम अभिनेत्री सुरभी चंदना लवकरच लग्न करणार आहे. हिंदुस्तान टाईम्सने दिलेल्या वृत्तानुसार, सुरभी चंदना तिचा बॉयफ्रेंड करण शर्मासोबत लवकरच लग्नगाठ बांधणार आहे. १३ वर्षे रिलेशनशिपमध्ये राहिल्यानंतर सुरभी चंदना तिचा बिझनेसमन बॉयफ्रेंड करण शर्मासोबत लग्न करणार आहे. मार्चच्या शेवटच्या आठवड्यामध्ये हे कपल लग्न करत त्यांच्या नात्याला नवीन नाव देणार असल्याचे बोलले जात आहे. मात्र त्यांच्या लग्नाची तारीख अद्याप जाहीर झालेली नाही. घरच्यांचा सल्ला घेतल्यानंतर हे कपल त्यांच्या लग्नाची तारीख जाहीर करू शकतात अशी माहिती समोर येत आहे.

सुरभी चंदना आणि करण शर्मा यांची पहिली भेट एका कॉमन फ्रेंडच्या माध्यमातून एका पार्टीत झाली होती. एकमेकांना पाहताच दोघेही प्रेमात पडले. तेव्हापासून दोघे रिलेशनशिपमध्ये आहेत. या कपलने आतापर्यंत त्यांच्या नात्याबद्दल मौन बाळगले होते. सुरभी चंदनाने करण शर्माच्या वाढदिवसाला ९ सप्टेंबर २०२२ रोजी सोशल मीडियावर पोस्ट करून प्रेमाची कबुली दिली होती. आता लवकरच हे कपल लग्न करणार असल्यामुळे त्यांच्या चाहत्यांना आनंद झाला आहे.

दरम्यान, सुरभी चंदनाने २००९ मध्ये सब टीव्हीच्या लोकप्रिय शो 'तारक मेहता का उल्टा चष्मा'मधून तिच्या करिअरची सुरुवात केली. या शोनंतर सुरभी अनेक शोमध्ये छोट्या भूमिकांमध्ये दिसली. पण अभिनेत्रीचे नशीब 'इश्कबाज' मालिकेमुळे चमकले. या मालिकेमुळे ती घराघरामध्ये पोहचली. याशिवाय सुरभीने 'संजीवनी', 'नागिन 5', 'शेरदील शेरगिल' यासारख्या मालिकांमध्ये काम केले आहे.