Death News: भारतीय संगीतसृष्टीसाठी धक्कादायक बातमी समोर आली आहे. टी-सीरिजचे संस्थापक गुलशन कुमार यांचे धाकटे भाऊ दर्शन कुमार यांचे 70 व्या वर्षी निधन झाले. त्यांनी 18 एप्रिल 2026 रोजी दिल्ली येथे अखेरचा श्वास घेतला. त्यांच्या निधनामुळे संपूर्ण संगीत आणि बॉलिवूड क्षेत्रात शोककळा पसरली आहे.

दर्शन कुमार हे जरी प्रकाशझोतात कमी दिसले, तरी त्यांनी टी-सीरिजच्या प्रगतीत महत्त्वाची भूमिका बजावली होती. अनेक नवोदित कलाकारांना संधी देणे आणि त्यांना पाठबळ देणे यासाठी ते ओळखले जात होते. त्यांच्या शांत स्वभावामुळे आणि मदतनीस या वृत्तीमुळे इंडस्ट्रीमध्ये त्यांना विशेष मान मिळाला होता.

त्यांच्या निधनाची बातमी समोर आल्यानंतर अनेक कलाकारांनी सोशल मीडियावर श्रद्धांजली अर्पण केली. प्रसिद्ध गायक मिका सिंगने भावनिक पोस्ट करत दर्शन कुमार यांना आदरांजली वाहिली. 'त्यांनी अनेक गायकांना संधी दिली आणि नेहमीच कलाकारांना पाठिंबा दिला.' असे मिका सिंगने आपल्या सोशल मीडियावर लिहले.

दर्शन कुमार हे टी-सीरिज परिवारातील महत्त्वाचे सदस्य होते. १९८३ साली गुलशन कुमार यांनी स्थापन केलेल्या या कंपनीने भारतीय संगीत क्षेत्रात मोठी क्रांती घडवली. पुढे ही कंपनी जगातील सर्वात मोठ्या म्युझिक लेबल्सपैकी एक बनली. गुलशन कुमार यांचे १९९७ मध्ये दुर्दैवी निधन झाले होते, त्यानंतर त्यांच्या कुटुंबीयांनी ही परंपरा पुढे चालवली. दर्शन कुमार यांनीही या प्रवासात मोलाचे योगदान दिले. दर्शन कुमार यांच्या जाण्याने केवळ टी-सीरिज परिवारालाच नव्हे, तर संपूर्ण संगीतसृष्टीला मोठी पोकळी निर्माण झाली आहे.