Sunny Deol Podcast

बॉलिवूडचा जबरदस्त आवाज आणि अॅक्शनमुळे प्रसिद्ध असलेला अभिनेता म्हणजे सनी देओल. सनी देओल त्याच्या अभिनयाने नेहमीच प्रेक्षकांची मने जिंकत असतो. सनी देओल आता एका नवीन कारणाने चर्चेत आला आहे. सनी देओलने नुकताच त्याच्या आयुष्यातील एक किस्सा सांगितला आहे.

सनी देओलचा 'गदर २' चित्रपट चांगलाच गाजतोय. चित्रपटाने आतापर्यंत ६०० कोटींच्या घरात कमाई केली आहे. सनी देओलने नुकतीच 'द रणवीर शो' या पॉडकास्टमध्ये हजेरी लावली होती. त्यात सनीनं एक किस्सा सांगितला. कॉलेजमध्ये असताना त्याने एका मुलीची छेड काढली होती. म्हणजेच तिला काहीतरी बोलला होता. छेड काढल्यानंतर तिचा भाऊ पाठलाग करत त्याच्या घरी पोहोचला, अशी हटके प्रसंगाची आठवण त्यानं सांगितली.

'शाळेत किंवा कॉलेजमध्ये कोणती नवीन मुलगी आली की आम्ही तिची छेड काढायचो. छेड काढायचो म्हणजे तिला काहीतरी बोलायचो. त्यावेळी आम्ही असेच वाहनातून जात होतो. तेव्हा एक सुंदर मुलगी आम्हाला दिसली. तेव्हा मी तिला काहीतरी बोललो असेन. त्यानंतर तिचा भाऊ आमचा पाठलाग करत घरापर्यंत पोहचला.

आम्हाला माहीतही नव्हतं की, त्या मुलीला भाऊ आहे. हा सर्व प्रकार पाहून माझे बॉडिगार्डही खाली आले. त्यावेळी मी माझी चूक मान्य केली. त्या मुलीच्या भावाला सांगितले की, मी चूक केली आहे. त्यामुळे तुला मला मारायचे असेल तर खुशाल मार. मी माझी चूक नेहमीच मान्य करतो. मी असाच आहे', असं सनी देओलनं सांगितलं. याच स्वभावामुळे चाहते त्याच्यावर खूप प्रेम करतात.

सनी देओलच्या वर्कफ्रंटबद्दल बोलायचे तर, त्याचा 'गदर २' हा चित्रपट सध्या बॉक्स ऑफिसवर धुमाकूळ घालतो आहे. आतापर्यंत या चित्रपटानं तगडी कमाई केली आहे. 'गदर २' चित्रपटाला ऑस्कर पुरस्कारासाठी नामांकन पाठवण्याचीही मागणी होत आहे.