Sunita Ahuja: देशभरात गणेशोत्सवाचा उत्साह पाहायला मिळत असून अनेक सेलिब्रिटींच्या घरीही गणपती बाप्पाचे आगमन झाले आहे. अभिनेता गोविंदाची पत्नी सुनीता आहुजा हिनेही गणेश चतुर्थीच्या एक दिवस आधी, रविवारी आपल्या घरी गणपती बाप्पाचे स्वागत केले. यावेळी सुनीता ढोल ताशाच्या तालावर उत्साहाने नाचताना दिसली. तिचा हा व्हिडिओ सध्या सोशल मीडियावर मोठ्या प्रमाणात व्हायरल होत आहे.

व्हायरल व्हिडिओमध्ये गणपतीची मूर्ती दुसरी व्यक्ती घेऊन जाताना दिसत आहे, तर सुनीता आहुजा ढोलच्या तालावर मनसोक्त नाचताना दिसते. घराच्या पायऱ्या चढतानाही तिचा उत्साह कायम असल्याचे पाहायला मिळते. मात्र, या व्हिडिओमध्ये गोविंदा किंवा त्यांची मुलं दिसत नसल्याने नेटकऱ्यांनी कमेंट्सच्या माध्यमातून अनेक प्रश्न उपस्थित केले आहेत.

‘गोविंदा कुठे आहे?’

सुनीताच्या व्हिडिओवर अनेकांनी कमेंट करत, “तुम्ही इथे एकट्या का आहात? गोविंदा कुठे आहे?”, “तुमची मुलं कुठे आहेत?” असे प्रश्न विचारले. त्यामुळे गोविंदा यंदाच्या गणेशोत्सवात सुनीतासोबत सहभागी होणार की नाही? याकडे चाहत्यांचे लक्ष लागले आहे.

विशेष म्हणजे, गेल्या वर्षी गणेशोत्सवादरम्यान गोविंदा आणि सुनीता यांच्या नात्यात मतभेद असल्याच्या चर्चा रंगल्या होत्या. त्यांच्या घटस्फोटाच्या बातम्याही समोर आल्या होत्या. मात्र, सुनीताने या चर्चांना फेटाळून लावत त्यांच्या नात्यात सर्व काही ठीक असल्याचे स्पष्ट केले होते. “आम्हाला कोणीही वेगळे करू शकत नाही,” असेही तिने म्हटले होते. पण, अलीकडच्या काळात पुन्हा एकदा या जोडप्याच्या वैवाहिक आयुष्याबाबत चर्चा सुरू झाली आहे. सुनीताने गोविंदाचे अभिनेत्री कोमल राणी स्वर्णकारसोबत संबंध असल्याचा आरोप केल्याचे वृत्त समोर आले होते. काही आठवड्यांपूर्वी गोविंदा विमानतळावर कोमलसोबत दिसल्यानंतर या चर्चांना आणखी उधाण आले.

यानंतर सुनीताने पापाराझींशी बोलताना कोमलवर टीका केली होती. तिने गोविंदाला ‘शुगर डॅडी’ ही म्हटले होते. आता गणपती बाप्पाच्या आगमनावेळी सुनीता एकटीच दिसल्याने पुन्हा एकदा त्यांच्या नात्याबाबत सोशल मीडियावर चर्चा रंगली आहे.