Lagnanantar Hoilach Prem: स्टार प्रवाहवरील लोकप्रिय मालिका ‘लग्नानंतर होईलच प्रेम’ सध्या प्रेक्षकांच्या मनात खास स्थान निर्माण करत आहे. या मालिकेतील जीवा आणि नंदिनी यांच्या लग्नानंतर सुरू झालेल्या नात्यात सतत चढ-उतार पाहायला मिळत आहेत. आता मालिकेत एक नवा आणि धक्कादायक वळण येणार आहे, ज्यामध्ये नंदिनी स्वतःहून जीवालाच घटस्फोट देण्यास तयार असल्याचं प्रोमोमधून स्पष्ट होतं.

नवीन प्रोमोमध्ये दाखवण्यात आलं आहे की, नंदिनी जीवा आणि त्याच्या जुन्या मैत्रिणीमधील आठवणींच्या वस्तू पाहते आणि त्यातच एक भेटवस्तू तुटते. ही वस्तू पाहून जीवा प्रचंड चिडतो आणि नंदिनीवर जोरात ओरडतो. त्यावर नंदिनी भावनिक होऊन म्हणते, “जीवा तुम्ही फक्त सांगा… घटस्फोट द्यायला मी तयार आहे.” हा संवाद प्रेक्षकांच्या मनाला चटका लावणारा ठरतो आहे.

दुसरीकडे, काव्याने पार्थच्या प्रेरणेने पुन्हा अभ्यास सुरू केला आहे. ती स्पष्टपणे म्हणते की आता ती सगळं विसरून आपल्या आयुष्याकडे सकारात्मक दृष्टिकोनातून पाहणार आहे. काव्या आणि पार्थच्या नात्यातही नविन बदल घडताना दिसत आहेत.

या प्रोमोमुळे मालिकेच्या पुढील भागांबाबत प्रेक्षकांमध्ये प्रचंड उत्सुकता निर्माण झाली आहे. नंदिनीचा निर्णय तात्पुरता आहे का? की ती खरोखरच जीवा सोडून जाणार आहे? जीवा काय उत्तर देणार? या सगळ्याची उत्तरं प्रेक्षकांना येणाऱ्या भागांमध्ये मिळणार आहेत. ‘लग्नानंतर होईलच प्रेम’ मालिकेचे हे नवीन वळण निश्चितच भावनिक, नाट्यमय आणि उत्कंठावर्धक ठरणार आहे. ही मालिका सोमवार ते शनिवार रात्री ७ वाजता स्टार प्रवाहवर प्रसारित होते.