Main Atal Hoon Movie:

बॉलिवूड अभिनेता पंकज त्रिपाठीचा (Pankaj Tripathi) बहुप्रतीक्षित 'मैं अटल हूं' हा चित्रपट आज प्रेक्षकांच्या भेटाला आला. प्रेक्षक या चित्रपटाची आतुरतेने वाट पाहत होते. अखेर आज त्यांची प्रतीक्षा संपली. हा चित्रपट भारताचे माजी पंतप्रधान अटेलबिहारी वाजपेयी यांच्या जीवनावर आधारित आहे.

पंकज त्रिपाठी या चित्रपटामध्ये अटलबिहारी वाजपेयी यांच्या भूमिकेत आहे. या चित्रपटाला प्रेक्षकांकडून खूप चांगली पसंती मिळत आहे. हा चित्रपट पाहण्यासाठी प्रेक्षक चित्रपटगृहांमध्ये गर्दी करत आहेत. आता या चित्रपटाचे स्पेशल स्क्रिनिंग महाराष्ट्र विधीमंडळाच्या सभागृहामध्ये होणार आहे. विधानसभा अध्यक्ष राहुल नार्वेकर यांनी ही माहिती दिली आहे.

राहुल नार्वेकर यांनी सांगितले की, अटलबिहारी वाजपेयी यांच्या जीवनावर आधारित 'मै अटल हूं' चित्रपट रिलीज झाला आहे. या चित्रपटाचे स्क्रिनिंग विधीमंडळ सभागृहात होणार आहे. सर्व आमदार आणि मंत्री यांना या चित्रपटासाठी आमंत्रित केले आहे. राजकीय जीवनातून समाजाचे प्रतिनिधित्व करणारे विचार यातून सध्याच्या समाजास हा चित्रपट मार्गदर्शक ठरणार आहे.'

देशाचे सर्वांचे लाडके नेते अटलबिहारी वाजपेयी, शिक्षण, विज्ञान, पायाभूत सुविधा आणि जागतिक संबंध मजबूत करण्यासाठी त्यांच्या योगदानासाठी प्रसिद्ध होते. या चित्रपटामध्ये अटल बिहारी वाजपेयी यांचे बालपणीचे दिवस, राजकीय कारकीर्द, बदल घडवून आणण्यासाठी आणि भारताला एक महान राष्ट्र बनवण्यासाठी त्यांनी केलेले प्रयत्न पाहायला मिळत आहेत.

दरम्यान, राष्ट्रीय पुरस्कार विजेते दिग्दर्शक रवी जाधव यांच्या या चित्रपटात अनेक कलाकारांनी काम केले आहे. भानुशाली स्टुडिओज लिमिटेड आणि लिजेंड स्टुडिओजच्या पाठिंब्याने या चित्रपटाची पटकथा ऋषी विरमानी आणि रवी जाधव यांनी लिहिली आहे. तर सलीम-सुलेमान यांनी मनोज मुंतशिर यांच्या गीतांसह संगीत दिले आहे. या चित्रपटातील गाण्यांना देखील प्रेक्षकांकडून खूप चांगला प्रतिसाद मिळत आहे.