Sonalee Kulkarni: मराठी चित्रपटसृष्टीतील ‘अप्सरा’ म्हणून ओळखली जाणारी सोनाली कुलकर्णी आता नव्या अंदाजात प्रेक्षकांच्या भेटीला येत आहे. येत्या १७ एप्रिलला प्रदर्शित होणाऱ्या ‘सालबर्डी’ या चित्रपटातील ‘मंजुळा’ या खास गाण्यातून सोनालीचा दिलखेचक आणि हटके अवतार पाहायला मिळणार आहे. या गाण्यामुळे चित्रपटाबद्दलची उत्सुकता आणखी वाढली आहे.

‘मंजुळा’ हे आयटम साँग आकर्षक कोरिओग्राफी आणि भन्नाट स्टेप्समुळे विशेष ठरणार आहे. या गाण्याची कोरिओग्राफी फुलवा खामकर यांनी केली आहे. गाण्याचे बोल गुरु ठाकूर यांनी लिहिले असून संगीत पद्मनाभ गायकवाड यांनी दिले आहे. तर हे गाणे आनंदी जोशी हिने आपल्या सुरेल आवाजात सादर केले आहे.

या गाण्याबद्दल बोलताना सोनालीने सांगितले की, “हे गाणं माझ्यासाठी खूप खास आहे. यामध्ये एक वेगळीच ऊर्जा आहे. प्रेक्षकांना काहीतरी नवीन आणि मनोरंजक देण्याचा आमचा प्रयत्न आहे.” तिच्या या विधानामुळे ‘मंजुळा’ गाण्याबद्दलची उत्सुकता अधिकच वाढली आहे.

‘सालबर्डी’ या चित्रपटाची निर्मिती अनिल देवडे पाटील, डॉ. गजानन जाधव आणि राम जाधव यांनी केली आहे. दिग्दर्शक रमेश साहेबराव चौधरी यांनी यापूर्वी वेगळ्या धाटणीचे चित्रपट देत प्रेक्षकांचे लक्ष वेधले आहे. आता ते ‘सालबर्डी’च्या माध्यमातून एक रहस्यमय आणि थरारक कथा घेऊन येत आहेत.

महाराष्ट्रातील दुर्गम भागातील ‘सालबर्डी’ गावाच्या पार्श्वभूमीवर आधारित हा चित्रपट भय, रहस्य आणि अस्वस्थ करणाऱ्या घटनांचा शोध घेणारा आहे. या मल्टीस्टारर चित्रपटात पूजा सावंत, शशांक शेंडे, ओंकार भोजने, भारत गणेशपुरे, अंशुमन विचारे यांसह अनेक कलाकार महत्त्वाच्या भूमिकांत झळकणार आहेत. एकूणच, आकर्षक कोरिओग्राफी, दमदार संगीत आणि सोनालीचा झिंग आणणारा अंदाज यामुळे ‘मंजुळा’ हे गाणे प्रेक्षकांसाठी व्हिज्युअल ट्रीट ठरणार आहे. त्यामुळे ‘सालबर्डी’ हा चित्रपट प्रेक्षकांच्या अपेक्षा पूर्ण करेल का, याकडे सर्वांचे लक्ष लागले आहे.