Shakira: लॅटिन पॉप संगीताची क्विन म्हणून जगभरात प्रसिद्ध असलेली गायिका आणि नृत्यांगना शकिरा लवकरच भारत दौऱ्यावर येणार असल्याची जोरदार चर्चा रंगली आहे. सोशल मीडियावर तिच्या भारत दौऱ्याबाबत मोठी उत्सुकता निर्माण झाली आहे. मुंबई, दिल्ली, बंगळुरू, पुणे आणि हैदराबाद या प्रमुख शहरांमध्ये तिचे म्युझिकल कॉन्सर्ट होण्याची शक्यता व्यक्त केली जात आहे. मात्र, या दौऱ्याबाबत अद्याप कोणतीही अधिकृत घोषणा करण्यात आलेली नाही.

शकिरा ही जगातील सर्वाधिक लोकप्रिय पॉप स्टार्सपैकी एक आहे. तिच्या गायनासोबतच भन्नाट डान्स स्टाईलमुळे तिने जागतिक स्तरावर मोठा चाहतावर्ग निर्माण केला आहे. भारतातही तिच्या गाण्यांचे लाखो चाहते असून, तिच्या लाइव्ह परफॉर्मन्सची अनेक वर्षांपासून चाहत्यांना प्रतीक्षा आहे.

फुटबॉल विश्वचषक २०२६शी संबंधित तिचे गाणे जागतिक स्तरावर गाजल्यानंतर हा तिचा पहिलाच मोठा आंतरराष्ट्रीय दौरा असल्याची चर्चा आहे. त्यामुळे भारतातील चाहत्यांमध्ये उत्सुकतेचे वातावरण निर्माण झाले आहे. सोशल मीडियावर अनेक चाहते शकिराच्या भारतातील कॉन्सर्टबाबत पोस्ट शेअर करत असून, तिकीट विक्री कधी सुरू होणार असे अनेक प्रश्न विचारत आहेत.

सूत्रांकडून मिळालेल्या माहितीनुसार, भारतातील प्रमुख शहरांमध्ये तिच्या लाइव्ह शोचे आयोजन करण्याची तयारी सुरू आहे. मुंबई, दिल्ली, बंगळुरू, पुणे आणि हैदराबाद या शहरांचा संभाव्य यादीत समावेश असल्याचे बोलले जात आहे. विशेष म्हणजे, पुण्यातही शकिराचा कार्यक्रम होण्याची शक्यता व्यक्त होत असल्याने महाराष्ट्रातील चाहत्यांमध्ये मोठा उत्साह पाहायला मिळत आहे.