Pathan Movie: आज अभिनेता शाहरुख खानचा वाढदिवस. गेल्या अनेक दिवसांपासून चाहत्यांच्या मनात त्याच्या 'पठाण' चित्रपटाविषयी उत्सुकता बरीच वाढली आहे. याच वर्षी मार्च महिन्यात चित्रपटाच्या सेटवरील काही खास फोटो व्हायरल झाले होते, तेव्हापासून प्रत्येकाच्या मनात चित्रपटाविषयी उत्सुकता आहे. शाहरुख तब्बल ३ वर्षांनंतर मोठ्या पडद्यावर झळकणार असल्याने प्रेक्षक चांगलेच उत्सुक आहेत. त्यानंतर काही महिन्यांपुर्वी ‘पठाण’ची घोषणा करण्यात आली. अधिकृतरित्या जॉन अब्राहम, दीपिका पदूकोण आणि शाहरुख खान यांच्या पात्रांची फक्त झलक दाखवली.

सोशल मीडियावर पठाण चित्रपट अजूनही ट्रेंडवर कायम आहे. नेहमीच चित्रपटातील शूटिंग दरम्यानचे काही खास फोटो व्हायरल होत असतात. सेटवरील ते फोटो सोशल मीडियावर बरेच चर्चेत आहेत. दीपिका आणि शाहरुख चित्रपटातील लूकमध्ये दिसत असून फोटो वाऱ्यासारखा सोशल मीडियावर व्हायरल होत आहे. फिल्मफेअरच्या सोशल मीडिया अकाऊंटवर हा फोटो पोस्ट करण्यात आला आहे.

चित्रपटाबाबत गुप्तता बरीच कलाकारांनी पाळलेली दिसत आहे. कलाकार मंडळी आपल्या सेटवरील खास फोटो सोशल मीडियावर शेअर करत असतात, पण 'पठाण' चित्रपटाबाबात असे काही होताना दिसत नाही.

व्हायरल झालेल्या या फोटोपासून चित्रपटाच्या टीझरची उत्सुकता आणखीच शिगेला पोहोचलेली आहे. त्याच्या वाढदिवसानिमित्त हा टीझर प्रदर्शित करण्यात येणार असल्याची सोशल मीडियावर चर्चा होत होती. नेटकऱ्यांनी 'पठाण' चित्रपटाचा हॅशटॅगही वापरायला सुरुवात केली आहे.

चित्रपटाच्या टीझर प्रदर्शनाचा निर्णय अजूनही झालेला नाही. त्यामुळे टीझर कधी येणार हे पाहणे महत्वाचे ठरणार आहे. 'पठाण' २५ जानेवारी २०२३ रोजी प्रदर्शित होणार आहे. हा चित्रपट सिद्धार्थ आनंद यांनी दिग्दर्शित केला असून यातील सलमान खानच्या छोट्याशा भूमिकेचीही चांगलीच चर्चा होत आहे.