Sanchita Ugale Death: टीव्ही अभिनेत्री संचिता उगले हिच्या निधनाने संपूर्ण मनोरंजन विश्वाला मोठा धक्का बसला आहे. अवघ्या 30 वर्षांच्या वयात अभिनेत्रीने आत्महत्या केल्याची धक्कादायक घटना समोर आली असून, तिचा मृतदेह तिच्या राहत्या घरातील छताच्या पंख्याला लटकलेल्या अवस्थेत आढळून आला. या प्रकरणाचा पोलीस अधिक तपास करत आहेत. संचिताच्या अकाली जाण्याने चाहते, मित्रपरिवार आणि सहकलाकारांमध्ये शोककळा पसरली आहे.

दरम्यान, टीव्ही अभिनेता शीजान खानने संचिताच्या निधनानंतर सोशल मीडियावर एक भावनिक व्हिडिओ शेअर करत अनेक महत्त्वाचे प्रश्न उपस्थित केले आहेत. या व्हिडिओमध्ये त्याने केवळ संचितालाच श्रद्धांजली वाहिली नाही, तर समाजातील बदलत्या नातेसंबंधांवरही भाष्य केले आहे.

व्हिडिओमध्ये शीजान म्हणतो, 'एखादी व्यक्ती गेल्यानंतर आपण तिच्याबद्दल अनेक पोस्ट लिहितो, दुःख व्यक्त करतो, पण ती व्यक्ती आपल्यासोबत असताना आपण तिच्यासाठी किती वेळ काढला होता, हा खरा प्रश्न आहे.' त्याच्या मते, सोशल मीडियावर श्रद्धांजली वाहणे सोपे असते, पण एखाद्याची वेळोवेळी विचारपूस करणे आणि त्याच्याशी संपर्क ठेवणे अधिक महत्त्वाचे असते.

शीजानने पुढे लोकांना आत्मपरीक्षण करण्याचे आवाहन केले. तो म्हणाला, 'जेव्हा एखादा मित्र किंवा जवळची व्यक्ती हळूहळू दूर जाऊ लागते, तेव्हा आपण शेवटचा फोन कधी केला होता? आपण स्वतःहून त्यांची विचारपूस करण्यासाठी पुढाकार कधी घेतला होता? मला त्याच्याशी बोलायला हवे होते’ कदाचित मी बोललो असतो तर ती व्यक्ती असती अशा पोस्ट करण्यापेक्षा ती आपल्या आयुष्यात असताना तिच्यासोबत संवाद साधणे अधिक गरजेचे आहे.'

व्हिडिओच्या शेवटी शीजान खानने सर्वांना एक महत्त्वाचा संदेश दिला. 'पश्चात्तापाचे हे चक्र थांबवा. आपल्या मित्रांशी, कुटुंबीयांशी आणि प्रियजनांशी वेळ काढून संपर्क ठेवा. त्यांच्यासाठी वेळ काढा, त्यांची विचारपूस करा. कारण कधीकधी एक फोन कॉल किंवा एक साधी चौकशीदेखील एखाद्याच्या आयुष्यात मोठा बदल घडवू शकते,' असे तो शेवतटी म्हणाला.