Salman Khan's Gym Fire: बॉलिवूडचा दबंग सलमान खानला मोठा धक्का बसला आहे. बॉडी डबल म्हणून काम करणाऱ्या कलाकाराला हार्ट अटॅकनंतर आता त्याच्या दिल्लीतील जिमला आग लागल्याची धक्कादायक घटना घडली आहे. गुरुवारी, २० ऑगस्ट रोजी रात्री दिल्लीतील ग्रेटर कैलाश-१ परिसरातील एम ब्लॉक मार्केटमध्ये ही घटना घडली. रात्री सुमारे १० वाजून १५ मिनिटांनी जिमच्या पहिल्या मजल्यावर अचानक आग लागली.

आगीची माहिती मिळताच दिल्ली पोलीस घटनास्थळी दाखल झाले. त्यानंतर अग्निशमन दलाही घटनास्थळी पोहोचले. अग्निशमन दलाचे जवान घटनास्थळी पोहोचण्यापूर्वीच पोलिसांनी जिममध्ये उपस्थित असलेल्या सर्वांना सुरक्षितपणे बाहेर काढले. त्यामुळे या घटनेत कोणालाही दुखापत झाली नाही.

पोलिसांनी दिलेल्या माहितीनुसार, एम ब्लॉक मार्केटमधील ही जिम सलमान खानच्या जिम ब्रँडअंतर्गत चालवली जाते. अग्निशमन दलाच्या जवानांनी घटनास्थळी पोहोचून आगीवर नियंत्रण मिळवले. आग विझवल्यानंतर परिसराची पाहणी करण्यात आली. पोलिसांच्या माहितीनुसार, या दुर्घटनेत कोणतीही जीवितहानी झालेली नाही. तसेच मोठ्या प्रमाणात आर्थिक नुकसान झाल्याचेही अद्याप समोर आलेले नाही.

प्राथमिक माहितीनुसार, शॉर्ट सर्किटमुळे आग लागली असावी, असा अधिकाऱ्यांचा संशय आहे. मात्र, आगीचे नेमके कारण अद्याप स्पष्ट झालेले नाही. या प्रकरणाचा तपास सुरू असून, आग कशामुळे लागली याचा शोध घेतला जात आहे.

सलमान खानचं पुढील काम

दरम्यान, सलमान खान सध्या आपल्या आगामी प्रोजेक्ट्समध्ये व्यस्त आहे. 'सिकंदर'नंतर अभिनेता त्याच्या पुढील कामांवर लक्ष केंद्रित करत आहे. तसेच सप्टेंबरपासून सुरू होणाऱ्या 'बिग बॉस २०'च्या सूत्रसंचालनासाठीही तो सज्ज होत आहे.