बॉलिवूडचा भाईजान सलमान खानचे वडील प्रसिद्ध अभिनेते आणि पटकथा लेखक सलीम खान सध्या रुग्णालयात उपचार घेत आहे. त्यांची प्रकृती चिंताजनक पाहायला मिळत आहे. ते सध्या मुंबईतील लीलावती रुग्णालयात एडमिट आहेत. मीडिया रिपोर्टनुसार, सलीम खान यांना व्हेंटिलेटर सपोर्टवर ठेवण्यात आले आहे. तसेच त्यांच्यावर आज शस्त्रक्रिया देखील होणार आहे.

सलीम खान 90 वर्षांचे आहेत. मंगळवारी सकाळी त्यांना अचानक उच्च रक्तदाबाचा त्रास झाला. त्यामुळे तातडीने रुग्णालयात दाखल करण्यात आले होते. सध्या त्यांच्यावर उपचार सुरू आहेत. मिळालेल्या माहितीनुसार, सलीम खान यांच्या मेंदूमध्ये रक्ताची गाठ झाल्याचे निदान झाले आहे. उपचारा दरम्यान सुरुवातीला त्यांना आयसीयूमध्ये ठेवण्यात आले होते. मात्र आता प्रकृती आणखी बिघडल्यामुळे त्यांना व्हेंटिलेटरवर ठेवण्यात आले आहे. तसेच रक्ताची गाठ काढण्यासाठी सलीम खान यांच्यावर आज शस्त्रक्रिया केली जाणार असल्याची माहिती मिळाली आहे.

डॉक्टर सलीम खान यांच्या तब्येतीकडे बारकाईने लक्ष देत आहेत. तसेच त्यांचे हेल्थ अपडेट देत आहेत. खान कुटुंबाचे चाहते आणि कलाकार, मित्र मंडळी सलीम खान लवकर बरे व्हावे यासाठी प्रार्थना करत आहेत. सलीम खान यांची प्रकृती बिघडल्याचे समजताच खान कुटुंब तसेच बॉलिवूडचे अनेक कलाकारांनी लीलावती रुग्णालयात धाव घेतली. सलमान खान देखील आपले चित्रपटाचे शूटिंग अर्ध्यावर सोडून तातडीने रुग्णालयात पोहोचला.

सलीम खान यांचे हिंदी चित्रपटसृष्टीत मोलाचे योगदान आहे. ते प्रसिद्ध पटकथा लेखक आणि अभिनेते आहेत. त्यांनी जावेद अख्तर यांच्यासोबत मिळून 'शोले', 'दीवार', 'जंजीर' आणि 'मिस्टर इंडिया' यासह अनेक चित्रपटांची निर्मिती केली. सलीम खान यांनी 1960 मध्ये रिलीज झालेल्या 'बारात' चित्रपटातून बॉलिवूडमध्ये एन्ट्री घेतली.