संजय गडदे, साम टीव्ही प्रतिनिधी

सिनेसृष्टीतून पुन्हा एकदा धक्कादायक बातमी समोर आली आहे. बिश्नोई गँगकडून सलमान खानच्या जवळच्या व्यक्तीला जीवे मारण्याची धमकी मिळाली आहे. सलमान खानच्या जवळच्या सहकाऱ्याला लॉरेन्स बिश्नोई गँगकडून खंडणीची धमकी आहे. धमकीनंतर पोलीसांनी सलमान खान आणि त्याच्या नातेवाईकांची सुरक्षितता वाढवली आहे. सलमान खानला आधीही बिश्नोई गँगकडून थेट जीवे मारण्याची धमकी मिळाल्या होत्या. तसेच त्याच्या घराबाहेर गोळीबाराची घटना घडली होती.

गेल्या काही दिवसांत अनेक मोठ्या आर्थिक उलाढाली होताना दिसत आहेत. या प्रकरणाचा पोलीस बारकाईने तपास घेताना दिसत आहे. तसेच बिश्नोई गँगच्या हालचालींवर पोलिसांचे लक्ष आहे. या सर्वामुळे कलाकारांच्या सुरक्षिततेवर मोठा प्रश्न उभा राहीला आहे. सलमान खानचा हा जवळचा व्यक्त उद्योग क्षेत्राशी संबंधित आहे. त्या व्यक्तीला कोट्यवधी रुपयांची मागणी करणारा धमकीचा ईमेल आला आहे. पाठवणाऱ्याने स्वतःला बिश्नोई टोळीशी संबंधित असल्याचे सांगितले जात आहे. सूत्रांनी दिलेल्या माहितीनुसार, या ईमेलमध्ये मोठ्या रकमेची मागणी केली आहे. पोलीस या प्रकरणाशी संबंधित पुरावे गोळा करत आहे.

लॉरेन्स बिश्नोई टोळीचा फिल्मी कलाकारांवर डोळा

एका मागोमाग बॉलिवूडचे कलाकार बिश्नोई गँगच्या निशाण्यावर असल्याचे दिसून आल्यामुळे बॉलिवूडमध्ये भीतीचे वातावरण निर्माण झाले आहे. तसेच खंडणीसाठी सेलिब्रिटींचा वापर केला जात असल्याची चर्चा सोशल मीडियावर चांगलीच रंगली आहे. काही दिवसांपूर्वीच बॉलिवूडचे प्रसिद्ध दिग्दर्शक रोहित शेट्टी यांच्या जुहू येथील निवासस्थानावर देखील लॉरेन्स बिश्नोई टोळीकडून गोळीबार झाला होता.

कालच रणवीर सिंगला देखील बिश्नोई गँगकडून धमकी आल्याची माहिती मिळाली आहे. रणवीर सिंगला कोट्यवधी रुपयांची मागणी करणारा धमकीचा मेसेज आल्याची माहिती मिळाली आहे. मीडिया रिपोर्टनुसार, ही धमकी व्हॉट्सअॅपवर व्हॉइस नोटद्वारे पाठवण्यात आली होती. पोलीस सध्या या प्रकरणाचा तपास करत आहेत. तसेच रणवीर सिंहची आणि अभिनेत्याच्या घराची सुरक्षा वाढवण्यात आली आहे. मनोरंजन क्षेत्रातील दिग्गजांना वारंवार धमक्या मिळत असल्यामुळे फिल्मी जगतात खळबळ उडाली आहे.