सोलापूरमधून मोठी बातमी समोर आली आहे. 'सैराट’ फेम अभिनेता अरबाज शेख याने आपल्या वडिलांच्या उपचारादरम्यान आलेल्या अनुभवाबाबत सोशल मीडियावर एक व्हिडिओ पोस्ट केला होता. हा व्हिडिओ व्हायरल झाल्यानंतर काही तासातच तो डिलीट करण्यात आला. दरम्यान तो व्हिडिओ का डिलीट करण्यात आला याबाबत अभिनेत्याने दुसरी पोस्ट करत स्पष्टीकरण दिले आहे. अरबाज शेखला झालेल्या मनस्तापाची दखल अन्न व औषध प्रशासनाने (FDA) घेतली असून नोबेल हॉस्पिटलमधील फातिमा मेडिकल फार्मा तात्पुरते बंद करण्यात आले आहे.

अरबाज शेख याच्या वडिलांना ब्रेन हॅमरेज आणि हृदयविकाराच्या उपचारासाठी सोलापूरातील नोबेल हॉस्पिटलमध्ये दाखल करण्यात आले होते. यावेळी रुग्णालय प्रशासनाकडून औषधे आणि इंजेक्शन्स रुग्णालयातीलच मेडिकलमधून खरेदी करण्यास भाग पाडले जात असल्याचा आरोप त्याने व्हिडिओद्वारे केला होता. तसेच बाहेरील मेडिकलमध्ये तीच औषधे जवळपास अर्ध्या किमतीत उपलब्ध असल्याचा दावाही त्याने केला होता. व्हिडिओमध्ये अरबाजने सांगितले होते की, सुरुवातीला १० हजार रुपयांचे डिपॉझिट भरल्यानंतर त्याला मोठ्या प्रमाणात औषधांची यादी देण्यात आली. बाहेरून औषधे आणण्याची परवानगी मागितल्यानंतर ती नाकारण्यात आली आणि रुग्णालयातील मेडिकलमधूनच खरेदी करण्यास सांगितले गेले. यामुळे उपचाराचा खर्च मोठ्या प्रमाणात वाढल्याचा आरोप त्याने केला.

या व्हिडिओनंतर अन्न व औषध प्रशासनाने तातडीने तपास सुरू केला. प्राथमिक चौकशीनंतर नोबेल हॉस्पिटलमधील फातिमा मेडिकल फार्मा बंद करण्यात आले असून संबंधितांना कारणे दाखवा नोटीस बजावण्यात आली आहे. पुढील सात दिवसांत मेडिकल चालकाचे म्हणणे नोंदवले जाणार असून त्यानंतर वरिष्ठ अधिकाऱ्यांकडून प्रकरणाची सविस्तर छाननी केली जाणार आहे. दोष सिद्ध झाल्यास कारवाई होऊ शकते. काही दिवसांपूर्वीच तुकाराम मुंढे यांनी, हॉस्पिटलच्या फार्मा बद्दल महत्त्वाचा निर्णय घेतला होता. रुग्णांची औषध हॉस्पिटलच्या फार्मामधूनच घेणे हा सर्वस्वी निर्णय रुग्णांच्या नातेवाईकांचा असेल. त्यांच्यावर कोणतीही बंधन लादता येणार नाहीत. असे आढळल्यास त्यांच्यावर कारवाई करण्यात येईल. असं असतानाही सोलापूरच्या संबंधित हॉस्पिटलने नियम भंग केले आहेत.

दरम्यान, कारवाईनंतर अरबाज शेखने संबंधित व्हिडिओ सोशल मीडियावरून हटवला आहे. सर्व स्तरांतून मिळालेल्या मदतीबद्दल आभार मानताना त्याने “माझ्या वडिलांची प्रकृती माझ्यासाठी सर्वात महत्त्वाची आहे आणि हा विषय माझ्यासाठी इथेच संपला आहे,” असे म्हटले आहे. या प्रकरणात नोबेल हॉस्पिटलसह प्राईड हॉस्पिटल, हृदयम हॉस्पिटल आणि सीएनएस हॉस्पिटल यांनाही अन्न व औषध प्रशासनाकडून कारणे दाखवा नोटिसा देण्यात आल्या असून पुढील चौकशी सुरू आहे.