सध्या थिएटरमध्ये 'धुरंधर 2' धुमाकूळ घालत आहे. रणवीर सिंहच्या 'धुरंधर 2'ची चाहते उत्सुकतेने वाट पाहत होते. मात्र थिएटरमध्ये 'धुरंधर 2' पाहायला जाणाऱ्या प्रेक्षकांसाठी एक आनंदाची बातमी आहे. महाराष्ट्राचे लाडके रितेश भाऊंनी चाहत्यांना एका खास अंदाजात सरप्राइज दिले आहे. अखेर बहुप्रतीक्षित चित्रपट 'राजा शिवाजी' चा टीझर प्रेक्षकांसमोर येणार आहे. 'राजा शिवाजी' चित्रपटाचा फर्स्ट लूक टीझर 'धुरंधर-द रिव्हेंज' या चित्रपटाबरोबर थिएटरमध्ये दाखवण्यात येणार आहे.

आता 'धुरंधर 2' पाहणे म्हणजे मनोरंजनाचा डबल धमाका होय. 18 मार्चपासून सुरू झालेल्या पेड प्रिव्ह्यूमध्ये प्रेक्षकांना भव्य इतिहासाची झलक पाहायला मिळेल. या संबंधित एक खास पोस्ट रितेश देशमुखने सोशल मीडियावर शेअर केली आहे. 'राजा शिवाजी' चित्रपटातून छत्रपती शिवाजी महाराजांची शौर्यगाथा जगाला सांगितली जाणार आहे. या चित्रपटात छत्रपती शिवाजी महाराजांच्या भूमिकेत रितेश देशमुख झळकणार आहे.

रितेश देशमुखने पोस्टमध्ये लिहिलं की, "पहिलं नमन माझ्या राजाला! आपला राजा... आपला अभिमान... 'राजा शिवाजी' ची पहिली झलक 'धुरंधर 2' चित्रपटातून आपल्या भेटीला घेऊन येत आहेत आपल्या राजाची गाथा - कधीही न पाहिलेल्या अभूतपूर्व रूपात!!!" रितेश देशमुखच्या या पोस्टवर चाहते कौतुकाचा, शुभेच्छांचा वर्षाव करत आहेत. प्रेक्षक 'राजा शिवाजी' चित्रपटासाठी खूपच उत्सुक असल्याचे पाहायला मिळत आहे.

रितेश देशमुखचा 'राजा शिवाजी' चित्रपट 1 मे 2026ला रिलीज होणार आहे. हा चित्रपट मराठी, हिंदी, तमिळ, तेलुगू, कन्नड, मल्याळम या सहा भाषांमध्ये पाहता येणार आहे. त्यामुळे चाहते खूपच खुश आहेत.'राजा शिवाजी' या चित्रपटात रितेश देशमुखसह संजय दत्त, अभिषेक बच्चन, महेश मांजरेकर, सचिन खेडेकर, भाग्यश्री, फरदीन खान, जितेंद्र जोशी, अमोल गुप्ते आणि जिनिलीया देशमुख यांचा समावेश आहे.