Gashmeer Mahajani Interview

ज्येष्ठ अभिनेते रवींद्र महाजनी यांच्या आकस्मित निधनामुळे मराठी सिनेसृष्टीत चांगलीच खळबळ उडाली आहे. अभिनेते रवींद्र महाजनी यांचं निधन १५ जुलै रोजी झालं असून दोन दिवसानंतर निधनाचे वृत्त माध्यमामध्ये प्रसिद्ध झाले. सोशल मीडियावर त्यांचा मुलगा आणि अभिनेता गश्मीर महाजनीला प्रचंड ट्रोलिंगचा सामना करावा लागला होता. अभिनेत्याने पहिल्यांदाच याविषयावर थेट भाष्य केलं आहे. नुकतंच अभिनेत्याने एका युट्यूब चॅनलला वडीलांच्या निधनानंतर मुलाखत दिली आहे.

नुकताच अभिनेता गश्मीर महाजनीने  ‘मित्र म्हणे’ या युट्यूब चॅनलला मुलाखत दिली आहे. यावेळी त्याने पॉडकास्ट मुलाखतीत ज्या गोष्टी आजवर फक्त गश्मीरला ठाऊक होत्या, त्याने त्याविषयीचा खुलासा केला आहे. त्याने मुलाखतीत सांगितले की, “गेल्या अनेक वर्षांपासून वडील फॅमिलीपासून वेगळे राहत होते. त्यांनी मला, माझ्या आईला आणि माझ्या बायकोला सुद्धा ब्लॉक केलं होतं. ज्यावेळी मला मुलगा झाला त्यावेळी वडील आमच्यासोबतच राहत होते. ज्यावेळी माझा मुलगा मोठा होत होता, तेव्हा माझ्या मनात त्याला आजोबांचा सहवास मिळावा, अशी भावना होती. जरी त्यांनी फॅमिलीपासून वेगळं राहण्याचा निर्णय घेतला असला तरी, त्यांनी आपल्या नातवासोबत वेळ घालवावा.”

मुलाखतीत गश्मीर पुढे म्हणाला, “वडील आमच्यापासून दुर राहत असल्यामुळे मी त्यांना नेहमीच व्हॉट्सॲपला मुलाचे फोटो आणि व्हिडीओ पाठवायचो. मी त्यांना तीन- चार वेळा व्हिडीओ पाठवले होते. त्यातून एक दोन वेळा व्हिडीओ पाहिले आणि नंतर त्यांनी मला ब्लॉक करून टाकलं. मी तुम्हाला त्यांचीही बाजु सांगतो, त्यांनी माझा फोन ब्लॉक करण्याचं कारण म्हणजे, त्यांचं मन खूप हळवं होत असल्यामुळे त्यांनी माझा फोन ब्लॉक करण्याची शक्यता आहे. त्यांचा मुडी स्वभाव असल्यामुळे त्यांना पुन्हा एकदा फॅमिलीमध्ये मिसळायचं नव्हतं त्यांना फक्त एकांतात जगायचं असल्यामुळे त्यांनी कदाचित मला ब्लॉक केलं होतं.”

मुलाखतीत पुढे गश्मीर महाजनी म्हणतो, “वडीलांच्या स्वभावाबद्दल बोलायचं तर, ते अजिबात कठोर किंवा निर्दयी नव्हते. त्यांना पुन्हा एकदा फॅमिलीच्या बंधनात अडकतील अशी भीती होती असा बहुतेक त्यांच्या डोक्यात विचार सुरू असण्याची शक्यता आहे. मध्यंतरी नातवाला भेटायला असं बोलण्यासाठी माझ्या आईने वडीलांना फोन केला होता, माझ्या बायकोनेही वडीलांना फोन केला होता. पण त्यांनी त्या दोघींनाही ब्लॉक केलं होतं. त्यांनी जरी आम्हाला ब्लॉक केलं असलं तरी, आम्ही बाकीच्यांकडून त्यांच्या विषयीची माहिती घ्यायचो.”

गश्मीरने दिलेल्या या मुलाखतीत अनेक विषयांवर त्याने मनमोकळेपणाने भाष्य केले आहे. सोबतच गश्मीरने नेटकऱ्यांनी केलेल्या ट्रोलिंगचा त्याला कशाप्रकारे त्रास झाला, यावर ही भाष्य केलं आहे.