Govinda: बॉलिवूड अभिनेता गोविंदाच्या वैवाहिक नात्याबाबत गेल्या काही काळापासून विविध चर्चा सुरू आहेत. काही दिवसांपूर्वी गोविंदा अभिनेत्री कोमलसोबत एअरपोर्टवर दिसल्यानंतर गोविंदाच्या अफेअरबद्दल पुन्हा चर्चा रंगल्या त्यात सुनीताने केलेलं वक्तव्य सोशल मिडियावर मोठ्या प्रमाणात व्हायरल झालं. मात्र, आता, अभिनेत्री राखी सावंतने गोविंदाबाबत केलेल्या वक्तव्यामुळे या प्रकरणाला आणखी वेगळं वळण मिळालं आहे.

राखी सावंतचा एक व्हिडिओ समोर आला आहे, ज्यामध्ये ती पापाराझींसमोर सुनीता आहुजा यांच्याशी फोनवर बोलताना दिसत आहे. हा कॉल 'स्पीकरफोन'वर आहे आणि राखी सर्वांसमोर बोलत आहे. राखी फोनवर सुनीता यांना सांगते की त्यांनी जे केले ते योग्यच होते. त्यावर सुनीता उत्तर देतात, "तुमच्यासारख्या लोकांनी माझ्या बाजूने बोलायला हवे; तुम्हाला तर सगळा प्रकार माहित आहेच." राखी सावंत म्हणते, "मी नेहमीच तुमच्या पाठीशी आहे. सुनीता-जी, घरच्या घरी बनवलेले 'डाळ-भात'च महत्त्वाचे असतात; बाहेरचे चिकन टिक्कासारखे पदार्थ खाल्ल्याने पोट नेहमी बिघडते." सुनीता आहुजा त्यावर प्रतिवाद करतात, "चिकन टिक्काही चांगलाच असतो पण त्यांनी विमानतळावर सोबत नेलेल्या त्या व्यक्तीला तुम्ही पाहिलं नाही का?"

सुनिता आहुजा यांनी एक धक्कादायक खुलासा केला आहे. सुनिता आहुजा पुढे म्हणतात, "मी पाच-सहा वर्षे गप्प राहिले. आता तू तिला माझी जागा देणार आहात का? मला विविध ठिकाणांहून फोन येत आहेत. एक पत्नी म्हणून मला कसं वाटेल?" यावर राखी उत्तर देते, "ते सगळं विसरून जा. २०० कोटी रुपयांवर लक्ष केंद्रित करा. जर दुसरी किंवा तिसरी स्त्री आली, तर ती सगळे पैसे घेऊन जाईल. त्याआधी सर्व काही तुमच्या नावावर करून घ्या." सुनिता म्हणाली, "मी कालच खटला मागे घेतला कारण ते लग्न करण्याच्या तयारीत होते."

गोविंदाबद्दल राखी सावंत काय म्हणाली?

पापाराझींशी बोलताना राखीने सांगितलं की, ती अनेकदा गोविंदासोबत एकाच खोलीत एकटी राहिली आहे. चित्रपटांमध्ये किंवा कार्यक्रमांमध्ये एकत्र काम करताना अनेकदा त्यांची भेट व्हायची. कधी ती गोविंदाला भेटण्यासाठी जायची, तर दोघे एकत्र जेवणही करायचे. मात्र, गोविंदाने कधीही तिच्याकडे चुकीच्या नजरेने पाहिलं नाही. राखीने गोविंदाचं समर्थन करत तो चांगला व्यक्ती असल्याचं म्हटलं. तसेच सुनीताही चांगली व्यक्ती असल्याचं सांगत पती-पत्नीमध्ये एवढा वाद का निर्माण झाला, असा सवाल तिने उपस्थित केला.

गोविंदा आणि कोमलच्या व्हिडिओमुळे वाद

काही दिवसांपूर्वी गोविंदा अभिनेत्री कोमलसोबत दिसला होता. दोघांचा व्हिडिओ सोशल मीडियावर व्हायरल झाल्यानंतर सुनीताने यावर नाराजी व्यक्त केली. तिने गोविंदावर टीका करत त्याला आपल्या मुलीच्या वयाच्या मुलीसोबत फिरताना लाज वाटायला हवी, असं म्हटलं. तसंच तिने गोविंदाला ‘शुगर डॅडी’ असा उल्लेखही केला.