सचिन जाधव

Urfi Javed: सध्या टेलिव्हिजन अभिनेत्री उर्फी जावेद आपल्या तोकड्या कपड्यांमुळे कमालीची चर्चेत आली आहे. तिने सार्वजनिक ठिकाणी अंगप्रदर्शन केल्याने हा सध्या वाद सुरु आहे. गेल्या काही दिवसांपासून उर्फी जावेद आणि भाजप नेत्या चित्रा वाघ यांच्यातील वाद संपण्याचं नाव घेत नाही. तिच्या या वागण्याने तरुण व लहान मुले यांच्या मनावर वाईट परिणाम होत आहे.याचा निषेध म्हणून वाघोलीतील एका ग्रुपने संक्रातीचे निमित्त साधत अभिनेत्री उर्फी जावेदला वाण म्हणून ऑनलाइन साडी भेट म्हणून पाठवली आहे.

सध्या उर्फी जावेद सोशल मीडियावर बरीच सक्रिय असून तिच्या अनेक पोस्ट चाहत्यांचे लक्ष वेधुन घेत आहे. या पोस्टने अनेकदा ती अडचणीतही आली आहे. शनिवारी पोलीसांनी उर्फी जावेदची काही काळ चौकशी देखील केली आहे. पोलीस चौकशी पुर्ण झाली असली तरी तिचे ट्वीटर वॉर काही संपायचे नाव घेत नाही. उर्फीने आज देखील काही ट्वीट्स केले होते.

"सार्वजनिक ठिकाणी असे पोशाख परिधान केल्याने वातावरण खराब होत आहे. यामुळे लहान मुलांवर याचा वाईट परिणाम होतो. तिच्या अशा वागण्यामुळे सर्वांच्याच भावना दुखावल्या गेल्या. त्यामुळे आम्ही सर्वांनी मकरसंक्रांतीचे निमित्त साधत उर्फीला साडी भेट दिली. त्यामुळे ती महाराष्ट्राच्या संस्कृतीचा आदर करत सार्वजनिक ठिकाणी व्यवस्थित पोशाख परिधान करेल." असे त्या ग्रुपने सांगितले.