BBMarathi Update : बिग बॉस मराठीचा यंदाचा सीजन हा त्यात सुरू असलेल्या भांडणासाठी ओळखला जात आहे. टीम A आणि टीम B मध्ये सतत खटके उडत असतात. त्याची नेटकरी सोशल मिडियावर चर्चा देखील करतात. मात्र आता बिग बॉसच्या घरातील एक नवा प्रोमो कलर्स मराठीने आपल्या इंस्टाग्राम अकाऊंटवरून शेअर केला असून त्यात घरात सर्व सदस्यांमध्ये खेळीमेळीचे वातावरण बघायला मिळत आहे.

या प्रोमोमध्ये वर्षाताई अरबाजची फिरकी घेत आहेत. अरबाज वर्षाताई यांना चिप्स मागत आहे. त्यावर वर्षाताई त्याला, ''मला मस्का लाव. मी सगळ्यात सुंदर स्त्री आहे, असं म्हण'', असे म्हणताना दिसत आहेत. त्यावर अरबाज देखील त्यांची तारीफ करत, ''ताई तुम्ही सगळ्यात सुंदर स्त्री आहात'' असे म्हणतोय. त्यावर वर्षाताई पुन्हा, ''निक्की आणि मी भांडत असताना नेहमी माझी बाजू घेशील असं म्हण''. असे सांगतात. त्यावर अरबाज ''मी नेहमी तुमची आणि तिची बाजू घेणार ताई'', असे म्हणतो. या संभाषणाने घरातील सदस्यांमध्ये एकच हशा पिकल्याचं या व्हिडिओमध्ये दिसत आहे. त्यामुळे आता दोन्ही टीम भांडण सोडून एकत्र आल्याचे चित्र येणाऱ्या भागात बघायला मिळणार आहे.

दरम्यान, गेल्या आठवड्यात छोटा पुढारी घनश्याम दरवडेचा बिग बॉसच्या घरातील प्रवास संपला आहे. त्यानंतर या आठवड्यात संग्राम चौगुले बिग बॉसच्या घरात वाइल्ड कार्ड एन्ट्री घेणार आहे. संग्रामच्या वाइल्ड कार्ड एन्ट्रीमुळे पुन्हा घरातील समीकरणं बदलणार असल्याच दिसणार आहे. तर दुसरीकडे घरात येताच संग्रामने अरबाज आणि निक्कीला टार्गेट केल्याचं पाहायला मिळत आहे.