मुंबई - अभिनेता सुशांत सिंह राजपूत (Sushant Singh Rajput) मृत्यू प्रकरणाचा अद्याप पूर्ण छडा लागलेला नाही. गेल्या काही महिन्यांपासून हे प्रकरण थोडं शांत झालं होत. मात्र, आता पुन्हा एकदा या प्रकरणी एनसीबीने (NCB)आरोपपत्राचा मसुदा न्यायालयासमोर सादर केला आहे. NCB ने ड्रग्ज प्रकरणी आरोपांचा मसुदा तयार केला आहे. ज्यामध्ये रिया आणि इतर ३५ आरोपींवर उच्च समाज आणि बॉलिवूडमधील लोकांना ड्रग्ज पुरवल्याचा आरोप आहे. (Sushant Singh Rajput News)

हे देखील पाहा -

या आरोपपत्रामध्ये सुशांतसिंह राजपूत मृत्यू प्रकरणात रिया चक्रवर्ती, शौविक चक्रवर्ती, सिद्धार्थ पिठाणी, दोन कर्मचारी आणि इतर अशा एकूण ३५ आरोपींची नावं या मसुद्यामध्ये समाविष्ट करण्यात आली आहेत. या आरोपींनी मिळून सुशांतला ड्रग्जच्या आहारी जाण्यासाठी प्रवृत्त केल्याचा आरोपही आहे. असा दावा या मसुद्यात करण्यात आला आहे. रिया चक्रवर्ती, तिचा भाऊ शौविक आणि त्यांच्या इतर काही मित्रांनी मिळून सुशांतला ड्रग्जचं व्यसन लावल्याचं या मसुद्यात नमूद करण्यात आलं आहे.

त्यासोबतच सुशांतच्या बँक अकाऊंटमधून ‘पूजा सामग्री’च्या नावाने ड्रग्जची खरेदी केली जात असल्याचं देखील एनसीबीने आपल्या मसुद्यात म्हटलं आहे. रिया चक्रवर्ती गांजा खरेदी करून सुशांतपर्यंत पोहोचवत होती. तर सुशांतचा मित्र सिद्धार्थ पिठानी सुशांतच्या बँक अकाऊंटमधून पूजा सामग्रीच्या नावाखाली ड्रग्जची खरेदी करत होता, असा देखील उल्लेख एनसीबीच्या आरोपपत्राच्या मसुद्यात करण्यात आला आहे. मृत्यूच्या २ वर्ष आधीपासूनच सुशांत सिंह राजपूतला ड्रग्ज मिळत होते, असा दावा या मसुद्यामध्ये करण्यात आला आहे.

सुशांतच्या मृत्यूने मोठा धक्का बसला होता

सुशांत सिंग राजपूत 14 जून 2020 रोजी त्याच्या घरात मृतावस्थेत आढळला होता. सुशांतच्या आकस्मिक निधनाने संपूर्ण देशाला धक्का बसला. बॉलिवूड स्टारच्या मृत्यूवर कोणाचाही विश्वास बसत नव्हता. सुशांतच्या कुटुंबीयांनी अभिनेत्याच्या मृत्यूसाठी रिया चक्रवर्तीला जबाबदार धरले आहे. सुशांत प्रकरणाचा तपास अनेक तपास यंत्रणांनी केला आहे पण मृत्यूचे कारण अद्याप समोर आलेले नाही. सुशांतचे चाहते आजही त्याला न्याय मिळावा अशी याचना करत आहेत. (Rhea Chakraborty Latest News)