Ketaki Chitale News

बीडच्या परळी येथील एका कार्यक्रमात वादग्रस्त विधान केल्याप्रकरणी अभिनेत्री केतकी चितळे चांगलीच अडचणीत सापडली आहे. केतकीवर बीडपाठोपाठ आता छत्रपती संभाजीनगरमध्येही गुन्हा दाखल झाला आहे.

मराठी सिनेसृष्टीतली अभिनेत्री केतकी चितळे (Ketaki Chitale) नेहमीच कोणत्या ना कोणत्या कारणामुळे चर्चेत असते. अगदी दोन दिवसांपूर्वी केतकीने बीडच्या परळीमधील कार्यक्रमात एका विशिष्ट समाजाबद्दल एक वादग्रस्त विधान केलं होतं. (Latest News)

ब्राह्मण ऐक्य परिषदेतील तिच्या भाषणाचा व्हिडीओ सोशल मीडियावर चांगलाच व्हायरल झाला होता. यामुळे केतकीवर टीकेची झोड उठली होती. वादग्रस्त विधान करून समाजात तेढ निर्माण केल्याचा आरोप केतकीवर करण्यात येत आहे. तसेच तिच्यावर तातडीने गुन्हा दाखल करा, अशी मागणीही काही सामाजिक कार्यकर्त्यांनी केली होती.

याबाबत बीडच्या परळी पोलिसांत तक्रार देखील दाखल करण्यात आली होती. या तक्रारीवरून पोलिसांनी केतकी चितळेसह ब्राह्मण ऐक्य परिषदेचे आयोजक असणारे तथा परळी नगरपालिकेचे माजी नगराध्यक्ष बाजीराव धर्माधिकारी यांच्याविरोधात गुन्हा दाखल केला होता. (Marathi Actress)

आता बीडनंतर छत्रपती संभाजीनगर पोलिसांतही केतकी चितळेविरोधात गुन्हा दाखल करण्यात आला आहे. याबाबत एका सामाजिक कार्यकर्त्याने पोलिसांत तक्रार दिली होती. दरम्यान, दोन ठिकाणी गुन्हा झाल्याने केतकी चितळेचे पाय आणखी खोलात गेले आहेत.

दरम्यान, यापूर्वी देखील २०२२ मध्ये केतकी चितळेला पोलिसांनी अटक केली होती. त्यावेळी तिने ज्येष्ठ नेते शरद पवार यांच्याबद्दल आक्षेपार्ह पोस्ट केली होती. तब्बल ४१ दिवसांनंतर तिची जामीनावर सुटका झाली. सध्या हे प्रकरण न्यायप्रविष्ट आहे. (Entertainment News)