मुंबई: कलर्स मराठीवर बिग बॉसच्या चौथ्या पर्वाला (Bigg Boss Season 4 ) २ ऑक्टोबर पासून सुरुवात झाली. यावेळी कोण बिग बॉसच्या घरात सर्वात जास्त धुडगूस घालणार हे पाहणे महत्वाचे ठरणार आहे. अतिशय वादग्रस्त रिअॅलिटी शो (Reality Show) म्हणून 'या' शोची ओळख आहे. नेहमीच कोण ना कोणतरी वादग्रस्त ठरतो. या पर्वाची थीम जरी 'ऑल इज वेल' (All Is Well) असली तरी पहिल्याच दिवसापासून बिग बॉसच्या घरात खटके उडायला सुरुवात झाली आहे.

बिग बॉसने पहिल्याच दिवशी स्पर्धकांसोबत चाहत्यांनाही चांगलाच धक्का दिला आहे. पहिल्याच दिवशी शो मधून चार स्पर्धक बाहेर गेलेले पाहायला मिळाले. स्पर्धकांनी घरात प्रवेश करताना प्रत्येकाला वेगवेगळ्या रंगाचे बॅण्ड दिले असून त्या बॅण्डमुळे त्यांच्यात एकूण चार ग्रुप तयार झाले होते. त्यात स्पर्धकांना लाल, पिवळा, निळा आणि जांभळा अशा चार रंगाचे बॅण्ड देत ग्रुप तयार केले होते. सदस्यांनी आपल्या ग्रुपमधील एका सदस्याला बहुमताने बिग बॉसच्या घरातील निरुपयोगी सदस्य म्हणून घोषित करायचे होते. या टास्कदरम्यान अपूर्वा नेमळेकर आणि प्रसाद जवादे यांच्यातील वाद चांगलाच विकोपाला गेला.

अपूर्वाने प्रसादचे नाव घेत आपले निर्भिड मत मांडले, पण ते मत प्रसादला पटले नसून त्यांच्यातील मत- मतांतरे स्पष्टपणे दिसून आले. हा कुस्तीचा खेळ नव्हे आणि तुला असं का वाटतं की तू (योगेश जाधव) त्याच्यापेक्षा उत्तम आहेस? या अपूर्वाच्या विधानावर प्रसादने मत मांडले की, हा कुस्तीचा खेळ नाहीये. मग यावरून अपूर्वा प्रसादला थांबवत म्हणते, तू मला बोलू देणार आहेस का? की स्वतः एकटाच बोलणार आहेस? असाच त्या दोघांचा वाद पुढे वाढतच गेला.

तसेच अपूर्वा- प्रसाद नंतर नेहमीच सोशल मीडियावर चर्चेत असणारा किरण माने आणि त्रिशूल मराठे मध्येही वाद झाला होता. कोणत्या निरुपयोगी सदस्याचे नाव द्यावे याविषयी ते एकमेकांशी बोलत होते. तेव्हाच त्रिशूल मराठे त्यांच्या गटातून किरण माने यांचे नाव देण्याचे सुचवतो. त्यावेळी तो म्हणतो, मला वाटतं किरण सर, कारण बाकी आम्ही सर्व तरुण आहोत.” त्यावर लगेचच किरण माने त्याला लगेच प्रत्युत्तर करतो, अरे मग मी काय म्हातारा आहे काय? असाच वाद काहीसा यांचाही पूढे वाढत गेलेला दिसतो. आता पुढे काय होईल व हा खेळ किती रंगतदार होईल हे पाहण्यास मज्जा येणार आहे.

या स्पर्धकांतील वाद-विवाद पहिल्याच दिवशी इतका विकोपाला गेला आहे. स्पर्धेत जस जसे वेगवेगळे टास्क समोर येतील त्यात प्रत्येक स्पर्धकांमध्ये वेगवेगळे तंटे पाहायला मिळतील. सध्या थीम जरी ' ऑल इज वेल' असली तरी बिग बॉसच्या घरात आलबेल काही दिसत नाही.