Marathi Actress Cancer: प्रसिद्ध मराठी अभिनेत्री राजश्री देशपांडे हिने आपल्या दमदार अभिनयाने प्रेक्षकांची मने जिंकली आहेत.सेक्रेड गेम्स, मँटो आणि ब्लॅक वॉरंट यांसारख्या कामांमधून ओळख मिळवलेल्या या अभिनेत्रीने अलीकडेच आपल्या आयुष्यातील अतिशय कठीण टप्प्याबद्दल खुलासा केला आहे. तिने स्तनाच्या कर्करोगावरील (Breast Cancer) शस्त्रक्रियेचा अनुभव सोशल मीडियावर शेअर करत अनेकांना भावूक केले.

मानसिकदृष्ट्या कोलमडून गेले...

राजश्रीने सांगितले की, जेव्हा तिला पहिल्यांदा कर्करोगाचे निदान झाल्याचे समजले, तेव्हा ती रुग्णालयात पूर्णपणे एकटी होती. त्या क्षणी ती मानसिकदृष्ट्या कोलमडून गेली होती. राजश्रीने लिहिले, जेव्हा तिला तिच्या आजाराचे निदान झाले, तेव्हा ती रुग्णालयात पूर्णपणे एकटी होती आणि पूर्णपणे खचून गेली होती. ती म्हणाली की, रुग्णालयात एकटी बसून रडण्याचा तो क्षण तिला आजही आठवतो. त्यावेळी तिच्या मनात अनेक प्रश्न होते, पण त्यापैकी एकाही प्रश्नाचे स्पष्ट उत्तर तिच्याकडे नव्हते.

स्वतःला सांभाळणे सोपे नव्हते

राजश्रीने सांगितले की, या कठीण काळात स्वतःला सांभाळणे सोपे नव्हते, पण हळूहळू तिने धैर्य गोळा केले. तिने तिच्या आजाराचा आणि उपचारांचा संपूर्ण प्रवास सर्वांसमोर उघडपणे मांडला, जेणेकरून लोकांना त्याबद्दल माहिती व्हावी आणि ते घाबरू नयेत.

मला माहित आहे की उद्या मी...

राजश्री पुढे म्हणाली, असे काही दिवस असतात जेव्हा माझ्यात ताकद नसावी असं वाटतं. मला फक्त शांत राहायचं असतं, मेरी ऑलिव्हरच्या कवितेतल्या त्या चिमण्यांसारखं, ज्या माझ्या खिडकीतल्या बोगनव्हिलियावर बसून माझ्यासोबत सूर्योदयाकडे बघत बसतात. पण आज मी ते करून दाखवलं. मी स्वतःसाठी एक स्माईल आणि एक मिठी मिळवली आणि त्या सर्व लोकांचा विचार केला जे या प्रवासात माझ्यासोबत आहेत, ज्यांनी फोन केला, मेसेज केले आणि मला खूप प्रेम दिलं. मला माहित आहे की उद्या मी लढण्यासाठी आणखी तयारी करत असेन, पण आजचा दिवस प्रेमाचा असू दे.

अभिनेत्रीला ग्रेड १ कॅन्सर

महत्त्वाचे म्हणजे, राजश्रीला ‘ग्रेड १’ स्तनाच्या कर्करोगाचे निदान झाले होते. वेळेत उपचार घेतल्यामुळे तिने शस्त्रक्रिया करून घेतली असून आता ती हळूहळू बरी होत आहे. तिच्या या अनुभवामुळे अनेक महिलांना प्रेरणा मिळत आहे.