बॉलिवूड अभिनेत्री कंगना रणौत यांनी हिमाचल प्रदेशच्या मंडी लोकसभेतून विजय मिळवला आहे. त्यांनी पहिल्या निवडणुकीमध्ये दणदणीत विजय मिळवला आहे. मंडी मतदारसंघामध्ये कंगना यांच्या विरोधात काँग्रेसचे विक्रमादित्य सिंह होते. विजय मिळवल्यानंतर कंगना यांनी नुकतीच इन्स्टाग्राम पोस्ट शेअर केलेली आहे. यावेळी त्यांनी आपल्या पोस्टमध्ये मंडीवासीयांचे आभार मानले आहे. त्या पोस्टवर एका मराठमोळ्या अभिनेत्याने कमेंट केलेली आहे.

कंगनाने इन्स्टाग्राम पोस्ट शेअर करत मतदारांचे आभार मानले आहेत. आभार मानताना कंगना रणौत यांनी आपल्या पोस्टमध्ये लिहिले की, "समस्त मंडीवासियांनो तुम्ही दाखवलेला विश्वास आणि दिलेलं प्रेम यासाठी मी तुमचे आभार मानते. हा विजय तुम्हा सर्वांचा आहे. पंतप्रधान मोदी आणि भाजपावरील विश्वासाचा हा विजय आहे. सनातन धर्म आणि मंडीच्या सन्मानाचा हा विजय आहे", असं कंगनाने पोस्टमध्ये म्हटलं आहे.

यावेळी कंगना यांच्या चाहत्यांनी त्यांचे अभिनंदन केले आहे. मराठमोळा अभिनेता श्रेयस तळपदेने कमेंट करत अभिनेत्री कंगना रणौत यांचे अभिनंदन केले आहे. श्रेयस तळपदेने "मनापासून अभिनंदन..." अशी कमेंट केली आहे. कंगना रणौत यांचा विजय जवळपास निश्चित झाला असून त्यांना नेमके किती मतं पडली आहेत, हे कळू शकलेलं नाही. अभिनेत्री कंगना रणौत आणि अभिनेता श्रेयस तळपदे हे दोघेही 'इमरजन्सी' चित्रपटातून प्रेक्षकांच्या भेटीला येणार आहे. लवकरच हा चित्रपट थिएटरमध्ये रिलीज होणार असून अद्याप रिलीज डेट जाहीर झालेली नाही.