मनोरंजन विश्वातून दुःखद बातमी समोर आली आहे. 'टॉप गन'मधील फ्लाईट इन्स्ट्रक्टर दिग्गज अभिनेते टॉम स्केरिट (Tom Skerritt) यांचे निधन झाले आहे. टीव्ही मालिका 'पिकेट फेन्सेस'मधील कठोर पण न्याय्य शेरीफ, 'एलियन' चित्रपटातील दुर्दैवी कॅप्टन या त्यांच्या भूमिका खूप गाजल्या. टॉम स्केरिट हे एमी विजेते होते. त्यांच्या कारकीर्दीबद्दल जाणून घेऊयात.

टाइम्स ऑफ इंडियाने दिलेल्या माहितीनुसार, अभिनेते टॉम स्केरिट यांचे बुधवारी (२१ ऑक्टोबर) ला निधन झाले. वयाच्या ९३ व्या वर्षी त्यांनी अखेरचा श्वास घेतला. अभिनेत्याच्या निधनाची बातमी समजताच कलाकार आणि चाहत्यांनी सोशल मीडियाच्या माध्यमातून श्रद्धांजली वाहिली आहे. तसेच अभिनेत्याच्या निधनाने कुटुंबावर दुःखाचा डोंगर कोसळला आहे.

स्केरिट यांना 'पिकेट फेन्सेस' या मालिकेसाठी दोनदा एमी पुरस्काराचे नामांकन मिळाले होते, ज्यापैकी १९९३ मध्ये त्यांना 'ड्रामा सीरिजमधील उत्कृष्ट मुख्य अभिनेता' हा पुरस्कार मिळाला. त्यांच्या कारकिर्दीतील इतर महत्त्वाच्या भूमिकांमध्ये 'टर्निंग पॉइंट'मध्ये शर्ली मॅक्लेन यांच्या संयमी पतीची भूमिका, 'स्टील मॅग्नोलियास'मध्ये सॅली फील्ड यांच्या पतीची भूमिका आणि 'कॉन्टॅक्ट' चित्रपटात जोडी फॉस्टर हिच्या परग्रहवासीयांशी संपर्क साधण्याच्या प्रयत्नांत अडथळा आणणाऱ्या एका धूर्त संधीसाधूची भूमिका यांचा समावेश आहे.

स्केरिट यांना खरी ओळख मिळाली ती दिग्दर्शक रॉबर्ट अल्टमन यांच्या १९७० मधील 'मॅश' या चित्रपटातून. टॉम स्केरिट यांनी १९६२ मध्ये 'वॉर हंट' (War Hunt) या चित्रपटाद्वारे आपल्या अभिनय कारकिर्दीची सुरुवात केली, ज्यामध्ये त्यांच्यासोबत तरुण रॉबर्ट रेडफोर्डही होते. मनोरंजन विश्वातील एक हरहुन्नरी तारा हरपला आहे.