Death News: चित्रपटसृष्टीतून एक अत्यंत दुःखद बातमी समोर आली आहे. चित्रपट निर्माते आणि दिग्दर्शक आदित्य कृपलानी यांच्या मुलीचे, अनुराधा पांडेचे कर्करोगामुळे निधन झाले आहे. मुलीच्या निधनामुळे आदित्य कृपलानी आणि त्यांच्या कुटुंबावर दुःखाचा डोंगर कोसळला आहे. स्वतः आदित्य यांनी सोशल मीडियावर एक भावूक व्हिडिओ शेअर करत आपल्या मुलीच्या निधनाची माहिती दिली. हा व्हिडिओ पाहून अनेक नेटकरी आणि कलाकार भावुक झाले असून, सोशल मीडियावर श्रद्धांजली अर्पण करत आहे.

इन्स्टाग्रामवर शेअर केला भावूक व्हिडिओ

आदित्य कृपलानी यांनी आपल्या इन्स्टाग्राम अकाउंटवर मुलगी अनुराधाबद्दलचा एक व्हिडिओ शेअर केला आहे. या व्हिडिओमध्ये ते मुलीच्या निधनाची बातमी सांगताना भावूक झाल्याचे पाहायला मिळते. नेमके काय बोलावे, हे त्यांना सुचत नसल्याचेही व्हिडिओत दिसते. या व्हिडिओला कॅप्शन देताना त्यांनी, 'आमच्यासाठी . @pandey.anuradha' असे लिहिले आहे. त्यांच्या या पोस्टनंतर अनेकांनी दुःख व्यक्त करत कुटुंबीयांना धीर दिला आहे.

स्टेज फोर कर्करोगाशी सुरू होती झुंज

आदित्य कृपलानी यांनी व्हिडिओमध्ये मुलीच्या आजाराबद्दलही सांगितले, 'अनुराधाला स्टेज फोर ट्रिपल निगेटिव्ह ब्रेस्ट कॅन्सरचे निदान झाले होते. या गंभीर आजाराशी ती झुंज देत होती. मुलाला कर्करोग झाल्याचे समजल्यानंतर पालकांच्या मनात अनेक आशा असतात. आपले मूल या संकटातून बाहेर पडेल आणि आपल्याला सोडून जाणार नाही, अशी प्रत्येक पालकाची इच्छा असते. जगात अनेकांनी कर्करोगामुळे आपली मुले, भावंडे आणि जवळची माणसे गमावली आहेत. मात्र, अशी वेळ आपल्यावरही येऊ शकते, याची कल्पना कधीच नसते. आज आम्ही ज्या वेदनेतून जात आहोत, त्याच वेदनेतून यापूर्वी अनेक कुटुंबे गेली असतील, याची जाणीव आता होत आहे, असे ते म्हणाले.

आरोग्याची काळजी घेण्याचे केले आवाहन

या कठीण प्रसंगातून जात असतानाही आदित्य यांनी लोकांना आरोग्याबाबत महत्त्वाचा संदेश दिला. आपल्या आजूबाजूचे वातावरण, मानसिक आनंद, शारीरिक सवयी आणि आहाराकडे प्रत्येकाने लक्ष द्यावे. आरोग्याला प्राधान्य देऊन आवश्यक बदल करण्याचा प्रयत्न करावा, असे आवाहन त्यांनी केले.