Munawar Faruqui Delhi Show Cancel: मुनव्वर फारुकी (Munawar Faruqui) एक प्रसिद्ध स्टँड-अप कॉमेडियन आहे. ज्यांचे शो पाहण्यासाठी लोक नेहमीच उत्सुक असतात. गेल्या काही दिवसांपासून तो वादाच्या भोवऱ्यात आहे. धर्म, राजकारणा यासह अनेक मुद्द्यांवर तो मोकळेपणाने बोलत असतो. त्यामुळे या सर्व प्रकारचा त्याच्या शोवर वाईट परिणाम होत असल्याचे पाहायला मिळत आहे. बंगळुरूनंतर आता मुनव्वर फारुकीचा दिल्लीतील (Delhi) होणारा शो देखील रद्द करण्यात आला आहे.

28 ऑगस्ट 2022 रोजी दिल्लीतील मुनव्वर फारुकीचा शो होणार होता. मात्र, दिल्ली पोलिसांच्या परवाना शाखेने मुनव्वर फारुकीच्या शोसाठी परवानगी देण्यास नकार दिला आहे. विश्व हिंदू परिषदेने दिल्ली पोलिसांना पत्र लिहून मुनव्वरचा शो रद्द करण्याची मागणी केली होती.

हे देखील पहा -

जर हा शो झाला तर विश्व हिंदू परिषद आणि बजरंग दलाचे सदस्य याला विरोध करतील, असे ते म्हणाले होते. हे पत्र विश्व हिंदू परिषदेचे दिल्ली अध्यक्ष सुरेंद्र कुमार गुप्ता यांनी दिल्लीच्या पोलीस आयुक्तांना लिहिले आहे. मुनव्वर फारुकीचा शो 28 ऑगस्ट रोजी मध्य दिल्लीतील केदारनाथ साहनी सभागृहात होणार होता.

25 ऑगस्ट रोजी विश्व हिंदू परिषदेचे दिल्ली अध्यक्ष सुरेंद्र कुमार गुप्ता यांनी पोलीस आयुक्तांना पत्र पाठवून फारुकी यांनी आपल्या शोमध्ये हिंदू देवतांची खिल्ली उडवली त्यामुळे भाग्य नगरमध्ये नुकताच जातीय तणाव निर्माण झाला होता. त्यामुळे मुनव्वर फारुकीचा शो तात्काळ रद्द करा, अन्यथा विश्व हिंदू परिषद आणि बजरंग दलाचे कार्यकर्ते आंदोलन करून शोचा निषेध करतील असा इशारा देण्यात आला होता.