मुंबई : प्रसिद्ध कॉमेडीयन कपिल शर्मा(Kapil Sharma) सध्या त्याच्या लोकप्रिय कॉमेडी शो 'द कपिल शर्मा शो'च्या पुनरागमनामुळे चर्चेत आहे. यावेळी शोमध्ये नवीन कलाकार प्रेक्षकांचे मनोरंजन करण्यास सज्ज झाले आहेत. अलीकडेच शोचा प्रोमो रिलीज झाला होता. कॉमेडीशोच्या कमबॅकच्या चर्चेनंतर आता कपिल शर्माने त्याच्या आगामी चित्रपटाचे पोस्टर रिलीज करून चाहत्यांना सरप्राईज दिले आहे. आता कॉमेडी किंग कपिल शर्मा लवकरच नव्या चित्रपटातून चाहत्यांच्या भेटीला येणार आहे.

कपिल शर्माने त्याच्या आगामी चित्रपटाचे पोस्टर शेअर करत चाहत्यांना ही आंनदाची बातमी दिली आहे. 'मेगा ब्लॉकबस्टर'(Mega Blockbuster) असे चित्रपटाचे नाव असून "माझ्या चाहत्यांसाठी नवीन भेट...आशा आहे की तुम्हाला आवडेल.'' असे कॅप्शन कपिलने लिहिले आहे. कपिल शर्माने सोशल मीडियावर पोस्टर शेअर करत चित्रपटाच्या ट्रेलर रिलीजची तारीखही दिली आहे.

कपिल शर्माने त्याच्या अधिकृत इस्टाग्राम अकाउंटवर चित्रपटाचा फर्स्ट लूक शेअर करत आगामी चित्रपटाची घोषणा केली आहे. 'मेगा ब्लॉकबस्टर'चा ट्रेलर ४ सप्टेंबरला रिलीज होणार आहे. चित्रपटातून कपिल शर्मा बऱ्याच वर्षांनी रूपेरी पडद्यावर झळकणार आहे. यामुळेच कपिल शर्माचे चाहते खूप खूश आहेत. विशेष म्हणजे चित्रपटात कपिल शर्मासोबत साऊथची अभिनेत्री रश्मिका मंदाना(Rashmika Mandanna) देखील प्रमुख भूमिकेत दिसणार आहे. अभिनेत्री रश्मिका मंदानाने चित्रपटातील फर्स्ट लूक शेअर केला आहे.

कपिल शर्माला आता नव्या दमात रूपेरी पडद्यावर पाहण्यासाठी त्याचे चाहते खूप उत्सुक आहेत. सोशल मीडियावर कॉमेडी किंगच्या चाहत्यांनी आपला आनंद व्यक्त केला आहे. तर दुसरीकडे, कपिल शर्मा पुन्हा एकदा त्याच्या संपूर्ण टीमसह प्रेक्षकांना हसवायला १० सप्टेंबरपासून येत आहे.