'सीआयडी' (CID) आणि 'आहट' (Aahat) सारख्या लोकप्रिय टीव्ही मालिकांचे निर्माते आणि दिग्दर्शक बी. पी. सिंग यांचे निधन झाले आहे. वयाच्या ७७ व्या वर्षी त्यांनी अखेरचा श्वास घेतला. त्यांच्या निधनामुळे भारतीय टेलिव्हिजन क्षेत्रावर शोककळा पसरलीय. चित्रपट निर्माते अशोक पंडित यांनी बीपी सिंग यांच्या निधनाची बातमी सोशल मीडियाच्या पोस्टद्वारे दिलीय. हृदयविकाराच्या झटक्यानं बी. पी सिंग यांचे निधन झाल्याची माहिती त्यांनी दिलीय. बी.पी.सिंगच्या निधनानंतर टीव्ही तारक-तारकांनी शोक व्यक्त केलंय.

चित्रपट निर्माते अशोक पंडित यांनी आपल्या अधिकृत इंस्टाग्राम अकाउंटवरून बी.पी. सिंग यांच्या निधनाची बातमी दिलीय. बी.पी. सिंग यांचा एक फोटो शेअर करत, अशोक पंडित यांनी कॅप्शनमध्ये त्यांच्या निधन झाल्याचं सांगितलंय. त्यांनी आपल्या पोस्टमध्ये म्हटलंय की, "प्रसिद्ध निर्माते-दिग्दर्शक बी.पी. सिंग यांच्या निधनाची बातमी ऐकून मला खूप दुःख झालंय.

आज पहाटे त्यांना हृदयविकाराचा झटका आला होता. ते एक अत्यंत प्रतिभावान चित्रपट निर्माते होते, ज्यांनी आपल्या 'सीआयडी' (CID) आणि 'आहट' (Aahat) सारख्या क्राईम शोच्या माध्यमातून ते परिचित झाले होते.

त्यांचे काम आजही पुढच्या पिढीसाठी एक प्रेरणा आहे. जेव्हा ते IFTDAचे अध्यक्ष होते, त्यावेळी मी त्यांचा सहकारी होतो. ते एक चांगले व्यक्ती आणि प्रेमळ मित्र होते. मनोरंजन क्षेत्रातील त्यांच्या योगदानासाठी ते सदैव स्मरणात राहतील. त्यांच्या कुटुंबीयांच्या आणि प्रियजनांच्या दुःखात आम्ही सहभागी आहोत, त्यांना भावपूर्ण श्रद्धांजली, अशी अशोक पंडित यांनी पोस्ट केलीय.