Urmila Matondkar: अभिनेत्री आणि राजकारणी उर्मिला मातोंडकर यांच्याविरोधात फेसबुकवर अश्लील आणि अपमानास्पद भाषेत पोस्ट करणाऱ्या व्यक्तीविरोधात पुण्यातील विश्रामबाग पोलीस ठाण्यात गुन्हा दाखल करण्यात आला आहे. या घटनेमुळे शहरात मोठा संताप निर्माण झाला असून, अनेक महिला कार्यकर्त्यांनी तीव्र प्रतिक्रिया व्यक्त करत कडक कारवाईची मागणी केली आहे.

धनंजय व्यंकटेश कुडतरकर (वय ५७, रा. बुधवार पेठ, पुणे) असे आरोपीचे नाव असून त्याने सोशल मीडियावर उर्मिला मातोंडकर यांच्याविरोधात अतिशय अश्लील, अवमानकारक आणि महिलांच्या प्रतिष्ठेला धक्का लावणारी पोस्ट शेअर केल्याचा आरोप आहे. ही पोस्ट पाहिल्यानंतर सामाजिक कार्यकर्त्या रुपाली चंद्रशेखर पाटील यांनी यासंदर्भात तक्रार दाखल केली होती. त्यांच्या तक्रारीवरून पोलिसांनी आयटी कायद्यानुसार गुन्हा नोंदवला आहे.

या प्रकारानंतर शहरातील महिला संघटना आणि सामाजिक कार्यकर्त्या आक्रमक झाल्या आहेत. त्यांनी आरोपीला त्वरित अटक करून कठोर शिक्षा देण्यात यावी, अशी मागणी केली आहे. महिला कार्यकर्त्यांनी सांगितले की, अशा प्रकारच्या आक्षेपार्ह पोस्ट समाजात महिलांबद्दल द्वेष पसरवण्याचे काम करतात आणि त्यामुळे कायदा-सुव्यवस्थेचा प्रश्न निर्माण होतो. त्यामुळे पोलिसांनी याप्रकरणी तत्काळ आणि ठोस कारवाई करावी.

विश्रामबाग पोलिसांनी दिलेल्या माहितीनुसार, संबंधित आरोपीचा मोबाईल तपासणीसाठी पाठवण्यात आला असून, सोशल मीडियावरील त्याचे इतर पोस्टही तपासले जात आहेत. या प्रकरणाचा सखोल तपास सुरू असून, आरोपीला लवकरच चौकशीसाठी ताब्यात घेतले जाईल, असे पोलिसांनी स्पष्ट केले आहे. हा प्रकार अभिनेत्री उर्मिला मातोंडकर यांच्या समर्थकांमध्ये आणि सामान्य नागरिकांमध्ये संतापाचे कारण ठरला आहे.