बॉलिवूड तसेच दाक्षिणात्या इंडस्ट्रीतील प्रसिद्ध अभिनेते प्रकाश राज यांच्या आईचे निधन झालं. त्या ८६ वर्षांच्या होत्या. गेल्या काही दिवसांपासून त्या आजारांनी त्रस्त होत्या. राहत्या घरी त्यांनी अखेरचा श्वास घेतला. त्यांच्या निधनाची बातमी समजताच चित्रपटसृष्टीतील अनेक दिग्गजांनी आणि चाहत्यांनी सोशल मीडियाच्या माध्यमातून त्यांना श्रद्धांजली वाहिली आहे.

प्रकाश राज यांच्या आईचे नाव स्वर्णलता असे आहे. प्रकाश यांच्या आईचा जन्म कर्नाटकात एका ख्रिश्चन कुटुंबात झाला होता, मात्र लहानपणीच आई वडिलांचं छत्र हरपल्यामुळे त्याचं बालपण एका अनाथालयात गेलं होतं. त्यांनी परिचारिका म्हणून आपले शिक्षण पूर्ण केलं.

प्रकाश राज यांनी एकदा एका मुलाखतीत सांगितले होते की, त्यांचे वडील दारूच्या आहारी गेले होते आणि त्यांच्या आईने एकटीनेच त्यांचा आणि संपूर्ण घराचा सांभाळ केला होता. ते आपल्या आईला आपली सर्वात मोठी प्रेरणा मानत असत आणि त्यांच्या आयुष्यावर तिचा खूप मोठा प्रभाव होता. आता त्यांच्या निधनाने प्रकाश राज यांच्यावर दुःखाचा डोंगर कोसळला आहे.

प्रकाश राज यांच्याबद्दल बोलायचे झाल्यास, त्यांनी तमिळ, तेलगू, कन्नड, मल्याळम आणि इंग्रजी, तसेच बॉलीवूडमध्ये मोठ्या प्रमाणावर काम करून स्वतःचे नाव कमावले आहे. त्यांनी आपल्या कारकिर्दीत पाच राष्ट्रीय पुरस्कार जिंकले आहेत. गेल्या काही काळापासून ते त्यांच्या 'जना नायकन' या चित्रपटाच्या प्रदर्शनाला झालेल्या विलंबामुळे चर्चेत आहेत.