Shah Rukh Khan Fans At Mannat:

बॉलिवूडचा (Bollywood) 'पठाण' आणि 'किंग खान' म्हणून ओखळ असलेल्या अभिनेता शाहरुख खान (Shah Rukh Khan) आज 58 वा वाढदिवस साजरा करत आहे. शाहरूख खानचा जगभरात मोठा चाहता वर्ग आहे. शाहरूखचा वाढदिवस (Shah Rukh Khan Bday) म्हणजे त्याच्या चाहत्यांसाठी एखाद्या सणापेक्षा कमी नाही. शाहरूख खानच्या वाढदिवसानिमित्त दरवर्षीप्रमाणे यावर्षी देखील त्याच्या चाहत्यांनी मन्नत बाहेर मोठी गर्दी केली होती.

शाहरूखची एक झलक पाहण्यासाठी आणि त्याला वाढदिवसाच्या शुभेच्छा देण्यासाठी बुधवार संध्याकाळपासूनच देशभरातील चाहते मन्नत बाहेर येत आहेत. या चाहत्यांनी मन्नत बाहेर एकच जल्लोष करत दिवाळीप्रमाणे किंग खानच्या वाढदिवसाचे सेलिब्रेशन केले. चाहत्याचे प्रेम पाहून शाहरूख खान यावेळी भावुक देखील झाला. मन्नत बाहेरील सेलिब्रेशनचे व्हिडीओ आणि फोटो सध्या सोशल मीडियावर व्हायरल होत आहेत.

शाहरुख खानच्या चाहत्यांसाठी आजचा दिवस खूपच खास आहे. दरवर्षीप्रमाणे यावर्षी देखील लाखो चाहते किंग खानच्या मन्नत या बंगल्याबाहेर पोहोचले आहेत. रात्रीपासूनच मन्नतबाहेर जल्लोषाचे वातावरण आहे. शाहरुखच्या चाहत्यांनी मन्नतबाहेर फटाके फोडत आतीषबाजी केली. यावेळी चाहत्यांनी शाहरुख खानला शुभेच्छा देत त्याच्या दीर्घायुष्यासाठी प्रार्थना देखील केली. चाहत्यांचे हे प्रेम पाहून किंग खान खूपच भावुक झाला आणि त्याने मध्यरात्री सोशल मीडियाच्या माध्यमातून चाहत्यांसाठी एक खास मेसेज देत त्यांचे आभार मानले.

शाहरुख खानने २ नोव्हेंबरला पहाटे ३ वाजून १८ मिनिटांनी एक्स म्हणजेच ट्विटर या सोशल मीडिया प्लॅटफॉर्मवर चाहत्यांसाठी एक खास पोस्ट शेअर केली. या ट्विटमध्ये त्याने असे लिहिले आहे की, 'विश्वास बसत नाही की तुम्ही सगळ्यांनी रात्री उशिरा येऊन मला शुभेच्छा दिल्या. मी फक्त एक अभिनेता आहे. मला खूप आनंद आहे की तुमचे थोडेसे मनोरंजन करू शकतो. मी तुमच्या सगळ्यांच्या स्वप्नात राहतो. मला तुम्हा सर्वांचे मनोरंजन करण्याची परवानगी दिल्याबद्दल धन्यवाद.'

वाढदिवसाच्या मध्यरात्री शाहरुख नेहमीप्रमाणे मन्नतच्या टेरेसवर आला आणि हात पसरून त्याची आयकॉनिक पोजही दिली. ज्याला बघून त्याचे चाहते जोरजोरात ओरडत त्याला शुभेच्छा देत होते. शाहरुखसोबत त्याचा मुलगा अबराम देखील होता. शाहरुख टेरेसवर आल्यानंतर त्याच्या चाहत्यांनी मोठ्याप्रमाणात फटाके फोडले. सध्या सोशल मीडियावर शाहरुख खान आणि त्याच्या घराबाहेरचे फोटो आणि व्हिडीओ तुफान व्हायरल होत आहे. ज्यामध्ये मन्नतबाहेर शाहरुखच्या चाहत्यांची गर्दी पाहायला मिळत आहे.

यावेळी शाहरुख खान जबरदस्त लूकमध्ये दिसला. शाहरुख खानने काळ्या रंगाचा टी-शर्ट आणि मिलेट्री प्रिंटेड पँट परिधान केली होती. त्याचसोबत त्याने डोक्यावर काळी कॅप आणि काळा गॉगल घातला होता. शाहरुखने यावेळी मन्नतबाहेर आलेल्या चाहत्यांना देखील फ्लॅईंग किस करत वेगवेगळ्या पोझ दिल्या. दरम्यान, शाहरुख खानचे चाहते त्याच्या पुढच्या चित्रपटाची आतुरतेने वाट पाहत आहेत. त्याचा डिंकी चित्रपट लवकरच प्रेक्षकांच्या भेटीला येणार आहे. आज शाहरुखच्या वाढदिवसाच्या खास प्रसंगी 'डिंकी' चित्रपटाचा टीझरही प्रदर्शित होण्याची शक्यता आहे.