बॉलिवूड अभिनेता आमिर खानचा मुलगा जुनैद खान 'महाराज' या चित्रपटातून बॉलिवूड इंडस्ट्रीमध्ये डेब्यू करत आहे. त्याचा पहिलाच चित्रपट वादाच्या भोवऱ्यात अडकला आहे. जुनैदचा 'महाराज' चित्रपट १४ जूनला 'नेटफ्लिक्स' या ओटीटीवर रिलीज होणार होता. पण या चित्रपटाचं प्रदर्शन हायकोर्टाकडून थांबवण्यात आले आहे. गुरूवारी जुनैद खानच्या 'महाराज' चित्रपटाला गुजरात हायकोर्टाने प्रदर्शनाला स्थिगिती दिली आहे. या चित्रपटाविरोधात काही हिंदू संघटनांनी हायकोर्टात याचिका दाखल केली. चित्रपटात हिंदू धर्माविरोधात काही गोष्टी दाखवण्यात आल्या आहेत, असा दावा याचिकेत करण्यात आला आहे.

ई-टाइम्सच्या वृत्तानुसार, गुजरात हायकोर्टाने गुरुवारी या प्रकरणावर सुनावणी करताना सांगितले की, 'आज (गुरूवारी) पुष्टीमार्ग संप्रदायाच्या अनुयायांनी गुजरात उच्च न्यायालयात याचिता दाखल केली होती. या याचिकेवर गुजरात हायकोर्टाने स्थगिती दिली आहे. न्यायालयाने ब्रॉडकास्टिंग अथॉरिटी, सेंट्रल बोर्ड ऑफ फिल्म सर्टिफिकेशन आणि 'महाराज' चित्रपटाचे निर्माते यशराज फिल्म, ओटीटी नेटफ्लिक्स यांना नोटीस बजावली. गुरूवारी दिलेल्या निर्णयानुसार, उच्च न्यायालयाने १८ जून २०२४ पर्यंत या चित्रपटावर ओटीटी आणि मीडिया प्रसारणावर बंदी घातली आहे.

सन १८६२च्या महाराज बदनाम प्रकरणावर आधारित हा चित्रपट कायदा-सुव्यवस्था बिघडवेल. तसेच हिंदू धर्माच्या अनुयायांविरुद्ध हिंसाचार भडकवेल असा आरोप या याचिकेतून करण्यात आला होता. म्हणून न्यायालयाने या चित्रपटावर बंदी घातली होती. सन १८६२मध्ये एका प्रतिष्ठित महाराजाने केलेल्या कथित गैरवर्तणुकीवर आधारित या चित्रपटाचं कथानक आहे. त्यावर तत्कालीन मुंबईच्या कोर्टातील इंग्लिश न्यायाधीशांनी यावर निकाल दिला होता. यामध्ये हिंदू धर्माविरोधात आणि भगवान श्रीकृष्णाविरोधात टिप्पणी केली होती.

चित्रपटाला विरोध होऊ नये यासाठी चित्रपट शांतपणे प्रदर्शित केला जाणार होता. न्यायालयात चित्रपटाविरोधात युक्तिवादही करण्यात आला होता. या याचिकेची दखल गुजरात हायकोर्टाच्या न्यायमूर्ती संगीता विषेन यांनी घेतली आहे. या प्रकरणाची पुढील सुनावणी येत्या १८ जून रोजी होणार आहे. जो पर्यंत युक्तिवाद पूर्ण होणार नाही, तो पर्यंत चित्रपटाची नवीन रिलीज डेट जाहीर केली जाणार नाही.