'बिग बॉस मराठी ५' ची सध्या प्रेक्षकांमध्ये चांगलीच क्रेझ पाहायला मिळत आहे. पहिल्या दिवसापासूनच चाहत्यांमध्ये या शोची क्रेझ पाहायला मिळत आहे. 'बिग बॉस' म्हटलं की भांडण, राडे, धमाल, मजा-मस्ती, प्रेम आणि मैत्री आलीच. त्याशिवाय 'बिग बॉस'च्या घरात टास्कच्या माध्यमातूनच स्पर्धकांची पुढची खेळी ठरते. 'बिग बॉस मराठी'च्या ५ व्या सीझनमधील पहिलं नॉमिनेशन कार्य आजच्या एपिसोडमध्ये पार पडणार आहे. 'बिग बॉस मराठी' सुरू होऊन चारच दिवस पूर्ण झाले असून चौथ्या दिवशी घरात पहिलं नॉमिनेशन कार्य पार पडणार आहे.

'बिग बॉस मराठी'च्या नव्या सीझनमध्ये आज नॉमिनेशन कार्याचा शुभारंभ होणार आहे. याबाबतचा प्रोमोदेखील सोशल मीडियावर शेअर करण्यात आला आहे. 'नॉमिनेशनची तोफ' असं या पहिल्या नॉमिनेशन कार्याचं नाव असणार आहे. प्रतिस्पर्ध्याला घराबाहेर काढण्यासाठी 'बिग बॉस'ने 'नॉमिनेशन तोफ' हे कार्य अवलंबलं आहे. पहिल्याच कार्यादरम्यान 'कोकण हार्टेड गर्ल' अंकिता वालावलकर आणि बॉलिवूड अभिनेत्री निक्की तांबोळी यांच्यात कडाक्याचं भांडण झालेलं पाहायला मिळणार आहे.

टास्कसाठी भिडताना अंकिता आणि निक्कीमध्ये धक्काबुक्की आणि बाचाबाचीदेखील झालेली पाहायला मिळेल. राड्यादरम्यान या दोन सदस्य टास्क कसा पूर्ण करणार हे पाहणं मनोरंजक ठरणार आहे. 'बिग बॉस मराठी'च्या नव्या सीझनमध्येच पहिल्या आठवड्यात कोणते सदस्य सेफ होणार आणि कोणते सदस्य नॉमिनेट होणार याची चाहत्यांना उत्सुकता लागली आहे. एक घर, 100 दिवस आणि 16 स्पर्धकांचा प्रवास आता सुरू झाला आहे. त्यामुळे प्रेक्षकांना मनोरंजनाची चांगलीच मेजवानी मिळत आहे.