बिग बॉसच्या घरात रोज एक नवीन राडा पाहायला मिळत आहे. घरात शॉकिंग घटना घडली आहे. ज्यामुळे बिग बॉसने दिव्या शिंदेला बाहेरचा रस्ता दाखवला आहे. दिव्याला सोशल मीडियावर 'सरकार' या नावाने ओळखले जाते. बिग बॉसच्या घरात एका टास्क दरम्यान घरातील सदस्य एकमेकांच्या चेहऱ्यावर फुली मारताना दिसतात. तेव्हा तन्वी आणि दिव्यामध्ये मोठा वाद होतो.

बिग बॉस स्वतः दिव्याला शांत होण्यासाठी सांगताना दिसले. मात्र दिव्या कुणाचे ऐकून घेत नव्हती. त्यानंतर दिव्या सर्वांसमोर बोलते की, बिग बॉस मला तुमच्याबद्दल आदर आहे. तुमच्यावर विश्वास आहे म्हणून येथे आली आहे. मला तुम्हाला दुखावण्याचा नाही. मला सध्या खूप लोकांकडून समजलं आहे की, मी शोमध्ये बाहेरच्या गोष्टी बोलते... पण मला आठवत नाही मी नेमकं काय बोलले? त्यानंतर दिव्या धमकी देते. दिव्याने दिलेली धमकी पाहून तन्वी, रुचिता, अनुश्री तिघी भडकतात. तसेच बिग बॉसच्या घरातील तिचा भाऊ राकेश बापटही याचा विरोध करतो.

दिव्याची धमकी

दिव्या म्हणते की, "मी बाहेर 'सरकार' म्हणून वावरते आणि हातात तलवार ठेवते. आता ती तलवार घरी असेल, याचा अर्थ असा नाही की, मी इथल्या गोष्टी विसरेन...मी बाहेर जाऊन ती तलवार चालवेन. आता ती तलवार कोणावर चालवेन हे depend करते तुम्ही माझ्याशी किती आणि कसे बोलताय..." दिव्या आपण धमकी देत असल्याचे कबुल देखील करते.

दिव्याची धमकीनंतर बिग बॉस तिची चांगली शाळा घेतात. ती बिग बॉसची आणि घरातील सदस्यांची माफी मागण्यासही नकार देते. त्यानंतर बिग बॉस दिव्याकडे नॅशनल टेलिव्हिजनवर घरातील सदस्यांना जीवे मारण्याची धमकी देण्याबद्दल स्पष्टीकरण मागतात. थोड्यावेळाने बिग बॉस दिव्याला घराबाहेर काढण्याचा निर्णय सुनावतात. आता भाऊच्या धक्क्यावर या आठवड्यात कोण घराबाहेर जात, हे पाहणे महत्त्वाचे ठरणार आहे.