Bigg Boss Marathi 6: ‘‘बिग बॉस’ मराठी ६’मध्ये सध्या प्रचंड वाद आणि नाट्य पाहायला मिळत आहे. नुकत्याच समोर आलेल्या प्रोमोमध्ये शोचा होस्ट रितेश देशमुख यांनी स्पर्धक विशाल कोटियनला जोरदार सुनावल्याचे दिसत आहे.

गेल्या काही दिवसांपासून घरात नॉमिनेशन टास्कदरम्यान मोठे वाद झाले. विशेषतः राकेश बापट आणि विशाल कोटियन यांच्यातील भांडणाने प्रेक्षकांचे लक्ष वेधून घेतले. या वादादरम्यान विशालने राकेशच्या वैयक्तिक आयुष्यावर, विशेषतः घटस्फोटावर टिप्पणी केल्यामुळे वातावरण अधिकच तापले.

प्रकरण इतके चिघळले की, दोघांमध्ये धक्काबुक्कीही झाल्याचे समोर आले. या घटनेनंतर हा वाद फक्त घरापुरता मर्यादित न राहता बाहेरही गाजला. सोशल मीडियावर अनेकांनी राकेश बापटला पाठिंबा दिला, तर विशालच्या वागण्यावर जोरदार टीका करण्यात आली.

आता ‘भाऊचा धक्का’ या विशेष भागात रितेश देशमुखने या प्रकरणाची गंभीर दखल घेतली आहे. प्रोमोमध्ये ते विशालला स्पष्ट शब्दांत म्हणताना दिसतात की, “तुम्ही राकेशला धक्का नाही मारला, तर ट्रॉफीला धक्का मारला आहे.” तसेच त्यांनी हे वर्तन अजिबात स्वीकारार्ह नसल्याचे सांगत, “महाराष्ट्राला हे पटलेलं नाही,” असेही ठामपणे सुनावले.

दरम्यान, या वादावर राकेश बापटच्या कुटुंबीयांनीही संताप व्यक्त करत कारवाईची मागणी केली आहे. त्यांनी वैयक्तिक आयुष्यावर बोलणे चुकीचे असल्याचे स्पष्ट केले. ‘Bigg Boss Marathi 6’ आता अंतिम टप्प्यात पोहोचला असून, अशा वादांमुळे शोची रंगत अधिकच वाढली आहे. प्रेक्षकांचे लक्ष आता येणाऱ्या भागाकडे लागले आहे.