'बिग बॉस मराठी' फेम अंकिता वालावलकरच्या (Ankita Walawalkar ) घरी लगीनघाई पाहायला मिळत आहे. नुकतेच अंकिता आणि कुणालचे पहिले केळवण पार पडले आहे. अंकिताही सोशल मिडिया इन्फ्लुएंसर आहे. तर कुणाल संगीत दिग्दर्शक आहे. 'बिग बॉस मराठी'मुळे अंकिताला खूप लोकप्रियता मिळाली आहे. तिने आपल्या स्वभावाने चाहत्यांची मने जिंकली आहेत.

अंकिता वालावलकर यावर्षी सुरुवातील लग्नगाठ बांधणार आहे. आता तिच्या लग्नापूर्वीच्या समारंभांना सुरुवात केली आहे. अंकिता आणि कुणालचे (Kunal Bhagat ) कुटुंबासोबत केळवण नुकतेच पार पडले आहे. याचा खास व्हिडीओ त्यांनी सोशल मिडियावर चाहत्यांसोबत शेअर केला आहे. व्हिडीओमध्ये दोघेही खूप खुश आणि एकमेकांची नावे घेताना पाहायला मिळत आहेत.

कुणालचा उखाणा

कुणालने केळवणासाठी भन्नाट उखाणा घेतला. तो म्हणाला की, "पाटावर पाट, पाटाखाली भुंगा, वालावलकरांची पोरगी पटवली ढांगचिकढींगा" हा उखाणा ऐकताच सर्वजण हसू लागतात.

अंकिताचा उखाणा

अंकिता केळवणात कुणालचे नाव घेत म्हणाली, "समोर आहे बासुंदी खायची झाली मला घाई, कुणालचं नाव घेते सुरू झाली लगीनघाई."

अंकिताने शेअर केलेल्या व्हिडीओला खास कॅप्शन दिलं आहे. तिने लिहिलं की, "घरचं पहिलं केळवण" तिच्या या पोस्टवर चाहते आणि कलाकारांकडून प्रेमाचा आणि शुभेच्छांचा वर्षाव होत आहे. कुणाल भगतने अनेक मराठी लोकप्रिय मालिकांना संगीत दिले आहे. केळवणासाठी अंकिता आणि कुणालने पारंपरिक लूक केला आहे. अंकिताने लाल रंगाची साडी नेसली आहे. तर कुणालने पांढरा शॉट कुर्ता परिधान केला आहे. दोघ एकत्र खूपच सुंदर दिसत आहेत. केळवणासाठी फुलांची सजावट आणि केळीच्या पानावर 'केळवण' लिहिलेले पाहायला मिळत आहे.