Ashok Saraf: मराठी प्रेक्षकांच्या मनावर अधिराज्य गाजवणारे ज्येष्ठ अभिनेते, महाराष्ट्र भूषण आणि पद्मश्री अशोक सराफ यांचा नागरी सत्कार मुख्यमंत्री देवेंद्र फडणवीस यांच्या हस्ते करण्यात आला. नागपूरमधील वसंतराव देशपांडे सभागृहात झालेल्या या सोहळ्यात अशोक सराफ यांची प्रकट मुलाखतही आयोजित करण्यात आली होती. प्रसिद्ध अभिनेते पुष्कर श्रोती यांनी घेतलेल्या या मुलाखतीत सराफ यांनी आपल्या अभिनय प्रवासासह अनेक विषयांवर दिलखुलास भाष्य केले.

यावेळी अशोक सराफ यांनी दिवंगत अभिनेते दादा कोंडके यांच्या विनोदशैलीवरही भाष्य केले. दादा कोंडके यांनी त्यांच्या सुरुवातीच्या काळात अशोक सराफ यांना चित्रपटात मोठी संधी दिली होती. दादांच्या सुरुवातीच्या चित्रपटांमध्ये लोककलांना अनुसरून उत्स्फूर्त आणि सहज विनोद पाहायला मिळायचा. मात्र, पुढे दादा कोंडके यांच्या चित्रपटांमध्ये डबल मिनिंग विनोद वाढू लागल्यानंतर आपण त्यांच्या चित्रपटांपासून दूर झाल्याचे सराफ यांनी स्पष्ट केले.

‘विनोद सकस असावा’

विनोद सकस असावा. डबल मिनिंग विनोद दीर्घकाळ चालत नाही. दादा कोंडकेंनी डबल मिनिंग विनोदाचा वापर करूनही चित्रपट यशस्वी करून दाखवले. मात्र, एखाद्या कलाकृतीला यश मिळाले की तिच्यातील अनेक गोष्टी झाकल्या जातात, असेही त्यांनी मिश्कीलपणे सांगितले.

अभिनय आणि विनोद करताना केवळ काय करायचे याचा विचार न करता काय करायचे नाही आणि कुठे थांबायचे, हे समजणेही तितकेच महत्त्वाचे असल्याचे सराफ यांनी सांगितले. विनोद पसरट न करता नेमका आणि परिणामकारक असला पाहिजे. त्यासाठी अभिनयातील बारकावे समजून घेणे आणि त्याचा अभ्यास करणे आवश्यक असल्याचे त्यांनी स्पष्ट केले.

निरीक्षणातून शिकलो अभिनय

अभिनय शिकण्यासाठी वाचनापेक्षा निरीक्षणाला अधिक महत्त्व मी दिले. आपल्या मामांची नाटक कंपनी होती. तिथेच मी कलाकारांच्या प्रत्यक्ष कृतीतून अभिनय समजून घेतला. अभिनय केवळ शिकवून येत नाही, तर तो पाहून, निरीक्षण करून आत्मसात करावा लागतो. थेट शिकवलेला अभिनय नक्कल ठरू शकतो हा महत्वाचा सल्ला देखील मला तिथे शिकायला मिळाला, असेही अशोक सराफ म्हणाले.