Pushpa 2 Stampede : 'पुष्पाभाऊ' म्हणजेच साऊथचा सुपरस्टार अल्लू अर्जुनच्या अडचणी वाढतच आहेत. ४ डिसेंबर रोजी 'पुष्पा 2' च्या प्रीमियर वेळी झालेल्या चेंगराचेंगरीत एका महिलेचा मृत्यू झाला होता आणि एक मुलगा गंभीर जखमी झाला आहे. या प्रकरणी आता हैदराबाद पोलिसांनी अल्लू अर्जुनला चौकशीसाठी समन्स बजावले आहे. अभिनेत्याला आज म्हणजेच २४ डिसेंबर रोजी सकाळी ११ वाजताच्या दरम्यान चिक्कडपल्ली पोलीस ठाण्यात चौकशीसाठी हजर झाला आहे.

या प्रकरणी हैदराबाद पोलिसांनी 13 डिसेंबर रोजी अल्लू अर्जुनला अटक केली आणि नंतर त्याला हायकोर्टातून अंतरिम जामीन मिळाला. अल्लू अर्जुनला अंतरिम जामीन मंजूर करण्यासोबतच न्यायालयाने त्याला या प्रकरणाच्या तपासात सहकार्य करण्याचे आदेश दिले आहेत.

गेल्या रविवारी आंदोलकांनी अल्लू अर्जुनच्या घराची तोडफोड केली. हे आंदोलक संध्या थिएटरबाहेर झालेल्या चेंगराचेंगरीत जीव गमावलेल्या महिलेला न्याय देण्याची मागणी करत होते. उस्मानिया विद्यापीठ संयुक्त कृती समितीचे (OU-JAC) सदस्य म्हणून ओळखल्या जाणाऱ्या निदर्शकांनी तेलुगू सुपरस्टारच्या घरावर दगडफेक केली.

मुलांना घरापासून दूर ठेवले

या घटनेनंतर सुपरस्टार अल्लू अर्जुनने आपल्या मुलांना सुरक्षित स्थळी नेले. यासोबतच अभिनेत्याचे वडील अल्लू अरविंद यांनी कायद्यावर विश्वास व्यक्त केला तोडफोड करणाऱ्यांकडून चेंगराचेंगरीत मृत्यू झालेल्या ३५ वर्षीय महिलेच्या कुटुंबाला एक कोटींची भरपाई देण्याची मागणी करण्यात आली. तोडफोड प्रकरणात पोलिसांनी तातडीने घटनास्थळी धाव घेत आंदोलनात सहभागी असलेल्या सहा जणांना अटक केली.