'दृश्यम ३' अजय देवगणच्या कारकिर्दीतील सर्वात सुपरहिट चित्रपट ठरला आहे. सलग पाच दिवस चित्रपटाची बॉक्स ऑफिसवर यशस्वी घोडदौड पाहायला मिळत आहे. अजय देवगणची मुख्य भूमिका असलेला 'दृश्यम ३' चित्रपट २ ऑक्टोबर रोजी प्रदर्शित झाला. अजय देवगण आणि तब्बू यांची जोडी थिएटर गाजवत आहे. 'दृश्यम ३' चित्रपट आता या फ्रँचायझीच्या इतिहासातील सर्वाधिक कमाईचा विक्रम मोडण्याच्या जवळ पोहोचला आहे. या चित्रपटाने अजय देवगणला संपूर्ण कारकिर्दीतील सर्वोत्तम 'ओपनिंग डे' मिळवून दिला आहे.

'दृश्यम ३' बॉक्स ऑफिस कलेक्शन दिवस ५

Sacnilk च्या रिपोर्टनुसार, 'दृश्यम ३'ने भारतात पहिल्या पाच दिवसांत २१६.५० कोटी रुपयांची नेट कमाई केली आहे. शुक्रवारी देशांतर्गत बॉक्स ऑफिसवर ६२ कोटी रुपयांची कमाई करत चित्रपटाने जोरदार सुरुवात केली. शनिवारी कमाईत थोडी घट होऊन ती ५३.५० कोटी रुपयांवर आली, परंतु रविवारी पुन्हा ६१ कोटी रुपयांची कमाई झाली. सोमवारी चित्रपटाने २१ कोटी रुपये कमावले. 'दृश्यम ३' ने रिलीजच्या पाचव्या दिवशी म्हणजे मंगळवारी १९ कोटी रुपयांचे कलेक्शन केले आहे.

'दृश्यम ३'ची रेकॉर्ड ब्रेक कामगिरी

मीडिया रिपोर्टनुसार, 'दृश्यम ३'ने मूळ 'दृश्यम' चित्रपटाच्या संपूर्ण थिएटरमधील कमाईपेक्षा (१०२.७५ कोटी रुपये ) दुप्पट कमाई आधीच केली आहे. तर हा चित्रपट आता 'दृश्यम २' च्या कमाईच्या आकड्याच्या खूप जवळ पोहोचला आहे. 'दृश्यम २' ची भारतातील एकूण नेट कमाई २३९.६७ कोटी रुपये होती. 'दृश्यम ३' आता ३० कोटी रुपयांनी मागे आहे. येणाऱ्या वीकेंडला 'दृश्यम ३' हा आकडा पार करून फ्रँचायझीमधील सर्वाधिक कमाई करणारा चित्रपट ठरू शकतो, असे चित्रपट दिसत आहे.

अजय देवगणने रचला इतिहास

'दृश्यम ३' ने पहिल्या दिवशी ६२ कोटी रुपयांची नेट कमाई केली, जी 'सिंघम अगेन'च्या ( ४३.५० कोटी रुपये ) तुलनेत बरीच जास्त आहे. 'दृश्यम ३' अजय देवगणच्या कारकिर्दीतील सर्वोत्तम 'ओपनिंग' करणारा ठरला आहे. 'दृश्यम ३'चे लेखन आणि दिग्दर्शन अभिषेक पाठक यांनी केले आहे. चित्रपटात अजय देवगण, जयदीप अहलावत, तब्बू, श्रिया सरन, रजत कपूर, प्रकाश राज, इशिता दत्ता आणि मृणाल जाधव कलाकार झळकले. 2015 ला 'दृश्यम' आणि 2022 ला 'दृश्यम 2' रिलीज झाला.