'हमारे बारह' या चित्रपटामुळे बॉलिवूड अभिनेता अन्नू कपूर सध्या कमालीचे चर्चेत आहे. नुकताच हा चित्रपट 'नेटफ्लिक्स' ओटीटीवर रिलीज झालेला आहे. सध्या चित्रपटाची टीम प्रमोशननिमित्त व्यग्र आहे. अन्नू कपूर यांना चित्रपटाच्या प्रमोशनवेळी कंगना रणौतच्या 'थप्पड' प्रकरणावर प्रश्न विचारण्यात आला होता. तेव्हा त्यांनी "कंगना कोण आहे ? त्यांच्याविषयी कोणी सांगेल का ? साहजिक आहे विचारत आहे म्हणजे, ती कोणी मोठी अभिनेत्री असेल. ती खूप सुंदर आहे का ?" असे उत्तर दिले होते. आता या सर्व प्रकरणावर खुद्द अभिनेत्रीने उत्तर दिलेले आहे.

कंगना रणौतने इन्स्टा स्टोरी शेअर करत अभिनेता अन्नू मलिकला उत्तर दिलेले आहे. ती म्हणते, "तुम्ही अन्नू कपूर यांच्या विधानाशी सहमत आहात का, की आपण एका यशस्वी महिलेचा तिरस्कार करतो. जर ती सुंदर असेल तर तिचा जास्त तिरस्कार करतो आणि जर ती शक्तिशाली असेल तर तिचा खूपच तिरस्कार करतो? खरं आहे का?" असा प्रश्न विचारत कंगनाने अन्नू कपूरला सडेतोड प्रत्युत्तर दिलं आहे. कंगना रणौतचं हे विधान सोशल मीडियावर तुफान व्हायरल होत आहे.

चंदीगढ विमानतळावर कंगना रणौतच्या कानाखाली देणाऱ्या महिला सुरक्षा रक्षक कुलविंदर कौरविरोधात घटनेनंतर लगेचच गुन्हा दाखल करण्यात आला. दिल्लीतील शेतकरी आंदोलनावेळी कंगना रनौतने "दिल्लीत शेतकरी 100-200 रुपये घेऊन आंदोलनाला बसले आहेत." असं वक्तव्य केलं होतं. या आंदोलनात कुलविंदर कौरचीही आई होती. म्हणून कुलविंदरच्या मनात कंगनाच्या या वक्तव्याचा संताप होता. घटनेबद्दल अनेक बॉलिवूड सेलिब्रिटींनी प्रतिक्रिया दिलेली होती.